Трамп ја предупреди ФИФА да не го заменува Инфантино 


Американскиот претседател Доналд Трамп ја предупреди ФИФА да не го заменува својот претседател Џани Инфантино, оценувајќи дека светското фудбалско раководно тело би направило „страшна грешка“ доколку го стори тоа, јавува Анадолу.

„ФИФА би направила страшна грешка доколку, од која било причина, дури и размислува за замена на претседателот Џани Инфантино“, напиша Трамп вчера во објава на својата платформа „Трут соушал“.

Трамп го пофали Инфантино велејќи дека тој е фантастичен и тврдејќи дека под негово раководство четирипати било организирано најуспешното Светско првенство во фудбал досега.

„Ако тој си замине, никогаш повторно нема да биде толку успешно или профитабилно!“, додаде Трамп.

Инфантино се соочува со сè поголем притисок по неуспешниот план за продажба на удел во Светското првенство на инвеститори од областа на приватниот капитал.

Сојузот на европските фудбалски асоцијации (УЕФА), Конфедерацијата на фудбалските асоцијации на Северна, Централна Америка и Карибите (КОНКАКАФ) и Азиската фудбалска конфедерација (АФЦ) вчера во заедничко отворено писмо оценија дека планот претставува „суштинско нарушување на довербата“ со институциите на кои ФИФА треба да им служи.

Во писмото тие предупредија дека „кога довербата е нарушена со измама, а поединецот се става над колективот што му ја доверил надлежноста, тој ја напушта таа должност“.

ФИФА минатата недела се извини за грешките направени во рамките на планот, наведувајќи дека високите официјални претставници на состанокот за кризата во Мароко „ја потврдиле својата целосна поддршка“ за претседателството на Инфантино.

ФИФА додаде дека предлогот „веќе не е на маса“ и порача дека „повеќе нема да толерира никакви напади врз својот интегритет, доброто управување и соодветната постапка“ и дека ќе ги преземе сите неопходни мерки за заштита и зачувување на своето име и углед.