Велика Британија воведе 31 нова санкција за Русија

ЛОНДОН (АА) – Британската Влада денес објави пакет од 31 нова санкција за Русија, додека Велика Британија го засилува економскиот притисок пред зимата, јавува Анадолу.

Во соопштението, Министерството за надворешни работи наведе дека 31 нова санкција се насочени кон „бродови од флотата во сенка за транспорт на течен природен гас, мрежи за дезинформации на Кремљ и сторители на тортура врз цивили и индоктринација на деца“.

„Овој потег е преземен откако Русија во септември лансираше повеќе од 3.100 беспилотни летала со млазен погон врз Украина, надминувајќи го својот црн воен рекорд од август“, се наведува во соопштението.

Санкциите опфаќаат осум лица вмешани во „арбитрарното притворање, тортура и малтретирање“ на украински цивили, се додава во соопштението.

Дополнително, санкционирани се уште седум лица поради нивната улога во „индоктринацијата и милитаризацијата“ на украински деца, вклучително и оние што биле депортирани од руските власти.

„Ги имаме како цел и приходите што помагаат да се одржат руската агресија и сторителите на ужасни злосторства врз украинските цивили, вклучително и деца. Велика Британија нема да отстапи во својата поддршка за Украина“, наведе министерот за Европа, лорд Вуд од Анфилд, во соопштението.

Британската Влада истакна дека новите мерки ја демонстрираат решеноста на земјата, заедно со партнерите, да ги повика на одговорност оние што се одговорни за „руската државна агресија“ врз Украина, да ги ограничува приходите што ја финансираат војната и да ја брани безбедноста на Украина, Велика Британија и Европа.

„Иако Велика Британија не бара конфронтација со Русија, сè додека (претседателот Владимир) Путин не одлучи да ја прекине својата бесмислена и варварска војна, поддршката на Велика Британија за Украина ќе остане непоколеблива“, се додава во соопштението.