Израелската армија за помалку од три години војна употребила муниција колку за претходните 30 години

Израелската армија за помалку од три години војна употребила количина муниција еднаква на онаа што ја потрошила во претходните три децении, објави вчера израелскиот весник „Маарив“, укажувајќи на зголемениот притисок врз нејзиниот персонал, опрема и финансии, јавува Анадолу.

Активностите на израелските воздухопловни сили во тој период, исто така, биле еднакви на приближно девет години операции во нормални услови, додека тенковите и оклопните транспортери потрошиле илјадници мотори, наведува весникот.

„Маарив“ посочува дека воената опрема може да биде заменета или поправена, но предупредува дека последиците врз персоналот многу потешко може да се надминат.

Само армијата, без другите израелски безбедносни агенции, загубила 1.138 припадници, додека кај 11.730 се утврдени физички или психолошки повреди, според извештајот.

Весникот наведува дека во овие бројки на крајот би можеле да бидат вклучени и уште илјадници лица што страдаат од психолошка траума.

Знаци на притисок се појавуваат и меѓу професионалните војници, при што значителен број од оние на кои им биле понудени командни позиции, наместо тоа се определуваат за помалку барани позиции во заднина или целосно ја напуштаат воената служба, се наведува во текстот.

Армијата, во просек, секој ден држи 53.000 резервисти на активна должност.

„Маарив“ објави дека еден месец резервна служба минатата година чинел околу 2,1 милијарда шекели (703 милиони долари), што е еквивалентно на цената на седум борбени авиони Ф-35 или 70 тенка „Меркава“.

Во моментов израелските сили се распоредени во она што весникот го опиша како три „безбедносни појаси“ во Газа, Либан и Сирија, покрај окупираниот Западен Брег кој, како што се наведува, ангажира најголем дел од воениот кадар.

Пет израелски баталјони се распоредени по должината на таканаречената жолта линија во Газа, покривајќи околу 60 отсто од енклавата, заедно со два засилени баталјона на границата, како и дополнителни сили за подготвеност и регионална одбрана.

„Маарив“ ја доведува во прашање одржливоста на толку големото распоредување, наведувајќи дека тоа ѝ наметнува голем финансиски и кадровски товар на армијата.

Исто така, весникот изразува загриженост за иднината на американската воена помош за Израел, посочувајќи дека актуелниот договор истекува во 2028 година откако во изминатата деценија биле обезбедени околу 33 милијарди долари.

Весникот го критикува премиерот Бенјамин Нетанјаху затоа што сигнализирал дека Израел во идниот договор ќе побара само околу половина од вредноста на постојниот пакет, наведувајќи дека високи израелски претставници претходно верувале дека администрацијата на Трамп е подготвена да одобри нов 10-годишен договор со слична вредност.

„Маарив“ додава дека на крајот армијата ќе мора да го намали обемот на своите распоредувања, како за да ги зачува ресурсите, така и за да го заштити својот персонал.