Израелски војници приведоа две палестински деца на Западниот Брег под обвинение за „шпионажа“

АНКАРА (АА) - Израелски војници притворија две палестински деца во јужниот град Хеброн на окупираниот Западен Брег под обвинение за „шпионажа“, известува Анадолу.

Палестинските медиуми објавија дека две палестински деца биле приведени од израелски војници вчера во стариот град Ел Халил (Хеброн).

Во веста се наведува дека децата, кои биле приведени под обвинение за „шпионажа“, додека плачеле преплашени, биле испрашувани од израелските војници за тоа каде е нивниот татко.

Израелските војници ги држеле децата приведени извесно време, а потоа ги ослободиле, по што следувал упад во домот на нивното семејство.

Снимките што кружат на социјалните мрежи, на кои се гледа приведувањето на двете мали деца, го откриваат угнетувањето со кое се соочуваат Палестинците на Западниот Брег и моментната состојба со израелската окупација.

- Се проценува дека децата се на возраст помеѓу четири и шест години

На видеото се прикажани две палестински деца, за кои се проценува дека се на возраст помеѓу четири и шест години, како плачат и се држат за раце.

Еден израелски војник ја зграпчува раката на едно од приведените деца, а потоа се обидува да ги оддалечи Палестинците кои протестираат поради односот на војниците кон децата.

На прашањето на минувачите зошто ги приведуваат децата, израелскиот војник одговорил дека го бараат нивниот татко.

Се гледа како израелскиот војник и покрај реакциите на минувачите и плачот на децата продолжува да ги држи приведени.

Западниот Брег е под израелска окупација од 1967 година. Ел Халил, во јужниот дел на Западниот Брег, е еден од градовите каде што окупацијата најдлабоко се чувствува.

Палестинците во Ел Халил живеат под репресија и од страна на израелските војници и од Израелците кои ја заземаат палестинската земја.