Иран му нареди на шведски дипломат да ја напушти земјата во рок од 48 часа во реципрочен потег

Иран денес му нареди на шведски дипломат да ја напушти земјата во рок од 48 часа во реципрочен потег откако Стокхолм еден ден претходно протера претставник на иранската амбасада, јавува Анадолу.

Иранското Министерство за надворешни работи го повикало шведскиот амбасадор во Техеран, Матијас Отерштет и го информирало дека еден шведски дипломат мора да го напушти Иран во рок од 48 часа, објави државната новинска агенција „ИРНА“.

Министерството соопшти дека одлуката е донесена откако Шведска му наредила на ирански дипломат, кој работел во иранската амбасада во Стокхолм, да ја напушти земјата.

Техеран ги отфрли како „неосновани“ обвинувањата на Шведска дека Иран се мешал во безбедносните прашања на земјата и остро го осуди протерувањето на иранскиот дипломат.

Техеран го опиша потегот на Шведска како „неоправдан“ и оцени дека со него се прекршува меѓународното право, обвинувајќи го Стокхолм за попречување на нормалното работење на иранската амбасада.

Министерството, исто така, ја обвини Шведска дека води „непријателска политика“ кон Иран и дека им дава засолниште на лица и групи што му се противат на Техеран.

Во соопштението се наведува дека Иран ќе ги преземе неопходните мерки за заштита на своите права и национални интереси, вклучително и преку примена на принципот на реципроцитет.

Вчера шведската Влада соопшти дека протерала претставник на иранската амбасада откако го повикала иранскиот амбасадор.

Стокхолм соопшти дека на претставникот му било наредено да ја напушти Шведска поради „активности што не се во согласност со Виенската конвенција за дипломатски односи“.

Шведската министерка за надворешни работи Марија Малмер Стенергард изјави дека одлуката била донесена со цел да се заштитат шведските граѓани и интереси, а министерот за правда Гунар Стромер рече: „Знаеме дека Иран долго време спроведува активности што претставуваат закана за безбедноста во Шведска и против Шведска.“