Esra Tekin
06 Февруари 2026•Ажурирај: 09 Февруари 2026
ИСТАНБУЛ (АА) – Новообјавените електронски пораки од досиејата поврзани со Џефри Епстин покажуваат дека осудениот сексуален престапник финансирал генетски тестирања како дел од обидите за користење на неговата ДНК во регенеративната медицина, јави Си-ен-ен, јавува Анадолу.
Според извештајот, години по неговата пресуда во 2008 година за дела поврзани со проституција, Епстин платил за експериментални тестови спроведени од лекар во една од водечките болници во САД, како и за истражувања поврзани со матичните клетки и имунолошкиот систем.
Истражувањата ги спроведувал Џозеф Такурија, тогашен лекар во Општата болница во Масачусетс во Бостон, кој истовремено соработувал во голема геномска истражувачка иницијатива на Медицинскиот факултет на Харвард.
Такурија за Си-Ен-Ен изјавил дека Епстин бил дел од Проектот за личен геном на Харвард, меѓународна база на генетски податоци, во која волонтери придонесуваат за научни истражувања.
Досега тој не бил јавно поврзуван со Епстин и не се соочува со обвинувања.
Такурија не бил директно вработен во Харвард ниту во Институтот Вајс, кој го надгледувал проектот. Од болницата соопштија дека немаат евиденција дека му било дозволено да ги спроведува овие истражувања.
Портпаролот на болницата потврди дека Такурија ја напуштил институцијата во 2022 година.
Документите објавени од Министерството за правда вклучуваат предлог од февруари 2014 година, во кој Такурија побарал финансиска поддршка од Епстин за приватна иницијатива за секвенционирање на геномите на пациенти со цел откривање на генетските причини за нивните заболувања.
Во предлогот биле наведени и можни истражувања специјално поврзани со Епстин.
Во јуни истата година Такурија му пратил на Епстин детална фактура за повеќе проекти, вклучително и почетна уплата од 2.000 долари за секвенционирање на дел од неговиот геном.
Фактурата опфаќала и трошоци за „персонализирани студии за долговечност“, кои вклучувале техники за уредување на гени, како и напомена дека Епстин доставил примерок од плунка.
Почетната уплата опфаќала 1.000 долари за анализа на егзомот и уште 1.000 долари за секвенционирање на фибробласти – клетки што се користат во истражувањата за забавување на стареењето. Персоналот на Епстин истиот ден пратил чек од 2.000 долари.
„Господин Епстин беше вклучен во Проектот за личен геном, со цел да се испита неговата генетска предиспозиција за различни здравствени состојби. Во еден момент беше уплатен чек од 2.000 долари за ДНК-секвенционирање“, изјави Такурија.
„Јас бев лекар истражувач, а тој беше предмет на истражување“, додаде тој.
Такурија наведе дека имало разговори за можноста Епстин да финансира пошироки истражувања, но дека тоа никогаш не се реализирало.
„Жал ми е за тоа што го преживеале неговите жртви и се каам што тогаш не знаев повеќе за неговото минато и за обемот на неговите злосторства“, рече тој.
Фактурата, исто така, предвидувала идни истражувања, вклучително и создавање нови матични клетки со почетна цена од 10.000 долари, како и пошироки студии за долговечност со вклучување на други пациенти.
Според документите, целосното секвенционирање на геномот на Епстин би чинело 11.400 долари, односно 21.000 долари доколку биле вклучени и неговите родители, иако тоа било неизвесно.
Доколку се реализирале сите предложени проекти, вкупната цена би достигнала 193.400 долари.
