Трамп: Сега САД се најголем светски производител на нафта

Претседателот на САД, Доналд Трамп, доцна синоќа изјави дека Соединетите Американски Држави станале најголем производител на нафта во светот, не сметајќи ги огромните резерви на Венецуела што САД неодамна ги додадоа во своите резерви, јавува Анадолу.

Говорејќи на собир во Далас, Тексас, Трамп го поздрави енергетскиот договор што ги опфаќа проценетите 65 милијарди барели докажани резерви на нафта на Венецуела, нарекувајќи го потенцијално „најголемиот договор во историјата на нашата земја“.

„Сега сме најголеми во светот и тоа без Венецуела, која штотуку ја додадовме во нашите мали резерви“, рече тој.

Белата куќа ги објави деталите за енергетскиот договор, според кој компанијата „Норт Американ Блу Енерџи Партнерс“ (НАБЕП) ќе ѝ додели на Канцеларијата за стратегиски капитал при Пентагон 35-процентен сопственички удел во својата матична компанија, без трошоци за американските даночни обврзници.

Стејт департментот на САД, исто така, би имал право да откупи 20 отсто од производството по цената на чинење.

Од Белата куќа соопштија дека „Норт Американ Блу Енерџи Партнерс“ обезбедила концесии со важност од 100 години за 17 нафтени полиња, а привремената претседателка на Венецуела, Делси Родригез, претходно го опиша договорот како аранжман со важност од 25 години.

Се очекува договорот да генерира 200 милијарди долари од надоместоци и даноци во текот на првите 25 години, според податоците на Белата куќа, при што средствата би биле наменети за обнова и општествен развој на Венецуела.