Украинската морнарица првпат доби НАТО-сертификат за команда со мултинационални сили за противминска борба

Украинската морнарица денес соопшти дека првпат добила сертификат од НАТО за команда со мултинационални сили за противминска борба откако ја завршила НАТО-евалуацијата од втор степен (NEL-2) за време на воената вежба „Си Бриз 2026“, јавува Анадолу.

Како што соопшти Морнарицата на Фејсбук, сертификатот ѝ овозможува на Украина капацитет признаен од НАТО за командување со мултинационални противмински сили, содејство со постојаните групи на НАТО и извршување на сите задачи поврзани со минското војување на море.

Оттаму додадоа дека штабот на Првата противминска дивизија ја поминал евалуацијата NEL-2 со оцена „способен за мисија“ (Mission Capable), со што единицата добила сертификат за учество во НАТО-операции.

Ова достигнување е резултат на тригодишна обука во услови на војна, при што персоналот ги усвоил НАТО-доктрините и процедурите и покрај тековниот конфликт, се додава во соопштението.

Морнарицата истакна дека сертификатот ја зајакнува интероперабилноста на Украина со НАТО и ќе ги поддржи идните напори за чистење на морските мини од Црното и Азовското Море.