„Фајненшл тајмс“: Иран ја разгледува можноста за напади врз американски воени цели во Европа доколку војната ескалира

Иран ја разгледува можноста за напади врз американски воени капацитети во Европа доколку американскиот претседател Доналд Трамп ја ескалира војната, а Техеран ги разгледува опциите за проширување на конфликтот надвор од Блискиот Исток, објави денес „Фајненшл тајмс“, јавува Анадолу.

Повикувајќи се на две лица блиски до иранската Влада, британскиот весник објави дека иранските сили проценувале потенцијални напади врз американски капацитети во земји од Југоисточна Европа, меѓу кои и Бугарија, која минатиот месец одобри воздухопловната база „Безмер“ да ја користат американски авиони за полнење гориво.

Кипар, каде што британска воздухопловна база беше погодена со беспилотно летало во март, исто така, бил разгледуван како една од потенцијалните цели во случај на обновена американска офанзива, според еден од изворите.

Иранските сили одделно ја разгледувале и можноста за напаѓање подморски оптички кабли во Ормускиот Теснец во случај на дополнителна ескалација, објави весникот.

За „Фајненшл тајмс“ еден извор изјавил дека Техеран подготвува опции за проширување на конфликтот доколку Трамп ги реализира претходните закани за напад врз иранската инфраструктура.

„Доколку САД отидат предалеку, Иран ќе се брани по секоја цена, ќе излезе надвор од регионот и ќе ја погоди и Европа“, изјавил изворот.

Овие наводи доаѓаат во време кога преговорите за повторно отворање на Ормускиот Теснец се во застој, а шансите за обновување на разговорите меѓу Техеран и Вашингтон се намалени.

Трамп вчера изјави дека со Техеран „нема разговори или преговори што се во тек или се закажани“.

Иранските воени претставници претходно предупредија дека секоја воена база што ќе се користи за извршување напади врз иранска територија може да се смета како цел.

Од медиумот се цитирани и воени експерти што велат дека Иран располага со ракети способни да достигнат делови од Јужна и Југоисточна Европа, иако нивната ефикасност и прецизност може да се намалат на поголеми растојанија.

Во јуни Иран и САД потпишаа меморандум за разбирање со цел да се стави крај на војната и да се отвори пат за поширок договор, но подоцна договорот пропадна поради меѓусебни обвинувања за прекршувања и обновени непријателства.

Оттогаш дипломатските напори не успеаја да донесат напредок во повторното отворање на Ормускиот Теснец или во обновувањето на преговорите за поширок договор.