„Хјуман рајтс воч“: Израел води политика на апартхејд против Палестинците

АНКАРА

„Хјуман рајтс воч“ (HRW) денес го обвини Израел за водење политика на апартхејд и за прогон на Палестинците во окупираните територии, јавува Агенција Анадолија (АА).

Во извештајот, групата за заштита на правата со седиште во Њујорк соопшти дека двојната политика на Израел, кодирана во неговите закони, ги привилегира еврејските Израелци додека ги потиснува Палестинците.

„Откритието е засновано врз сеопфатната политика на израелската Влада за одржување на доминацијата на еврејските Израелци над Палестинците и на сериозните злоупотреби извршени врз Палестинците што живеат на окупираната територија, вклучително и во Источен Ерусалим“, соопштија од „Хјуман рајтс воч“ (HRW).

Групата за права соопшти дека ја заснова својата документација за злоупотребите од Израел на Палестинците по повеќегодишното разгледување на документите и изјавите за планирање на израелската Влада.

„Во Ерусалим, на пример, планот на Владата [на Израел] за Општината, вклучително и западниот и окупираниот источен дел од градот, ја поставува целта за „одржување солидно еврејско мнозинство во градот“, па дури и ги специфицира демографските стапки што се надева да ги одржи.“

Коментирајќи го извештајот, извршниот директор на ХРВ, Кенет Рот, рече дека „негирањето на милиони Палестинци, на нивните основни права, без никакво легитимно безбедносно оправдување и единствено затоа што се Палестинци и не се Евреи, не е само прашање на насилна окупација“.

Рот рече дека израелската политика има за цел „да привилегира еден народ на штета на друг“.

ХРВ ги повика земјите да ја условат продажбата на оружје и воената и безбедносна помош на Израел и да преземат конкретни и проверливи чекори кон завршување на извршувањето на овие злосторства.

Израел го отфрли извештајот на ХРВ.

​​​​​​​Израел исто така се соочува со истрага за воени злосторства од страна на обвинителот на Меѓународниот кривичен суд во врска со воената операција во Газа летото 2014 година и израелската политика за населување во окупираниот Западен Брег и Источен Ерусалим.