Шведска бара експропријација на имотот на руски државјанин во близина на воена база

Шведските вооружени сили поднесоа барање за експропријација на имот во близина на поморската база Муско, наведувајќи ја загриженоста за националната безбедност и сопственоста на имотот од страна на руски државјанин, објави денес шведскиот сервис СВТ, пренесува Анадолу.

Шведската агенција за одбранбени објекти го поднесе барањето до Владата, наведувајќи ја потребата од заштита на вооружените сили и националната безбедност.

Вооружените сили соопштија дека потегот е поттикнат од безбедносната ситуација, заканата од руските беспилотни летала и статусот на сопственост на имотот.

Сопственикот на имотот има руско државјанство и „претставува безбедносна закана“ за Шведските вооружени сили, се наведува.

„Нема ништо поважно од безбедноста на Шведска. Ние сме во најсериозна безбедносна ситуација од крајот на Втората светска војна и заканата за Шведска и Алијансата е реална“, изјави началникот на Генералштабот за одбрана, генерал-потполковник Карл-Јохан Едстром.

Имотот, наводно, е единствено место во близина на базата Муско што не е под контрола на вооружените сили и е потребно за да се воспостави „ефикасна одбрана“ на блиската база, особено од беспилотни летала.

Барањето беше поднесено врз основа на постојната законска одредба што ѝ дозволува на државата да експроприра површини кога тоа е потребно за национална одбрана.