128.000 Израелци досега потпишаа петиции за враќање на заложниците од Газа

ЕРУСАЛИМ / АНКАРА (АА) - Бројот на Израелци кои потпишале петиции со барање за итно враќање на заложниците од Појасот Газа, дури и по цена да се запре тековната војна против Палестинците, достигна 128.000, додека во оптек се речиси 50 различни петиции, јавува Анадолу.

Според платформата „Рестарт Израел“, која објавува петиции за потпишување од страна на израелските граѓани, бројот на потписници денес достигнал 128.114, што е значително зголемување во однос на 120.000 потписи евидентирани еден ден претходно.

Исто така, платформата соопшти дека бројот на активни петиции од 43 вчера се зголемил на 47 денес.

Петициите пристигнуваат од различни извори, вклучувајќи резервисти и пензионирани припадници на израелската армија, како и од цивилни групи кои го поддржуваат воениот дискурс. Сепак, најголемиот дел од потписниците се обични граѓани.

Според податоците на веб-страницата „Рестарт Израел“, повеќе од 11.000 резервисти и пензионирани војници потпишале вкупно 20 петиции, поврзани со различни израелски воени единици.

Минатата недела, израелскиот премиер Бенјамин Нетанјаху ги обвини воените потписници за непокорност и им се закани со отпуштање, при тоа тврдејќи дека зад ваквите иницијативи стојат странски финансирани организации кои имаат цел да ја соборат неговата влада, која е на власт од крајот на 2022 година.

Движењето со петиции започна откако пропадна првата фаза од договорот за прекин на огнот и размена на затвореници, посредуван од Катар и Египет, со поддршка од САД. Додека Хамас ги исполни своите обврски, Нетанјаху — под притисок од својата крајно-десничарска коалиција — одби да премине кон втората фаза, по што Израел ги обнови воените операции на 18 март.

Од почетокот на нападите во октомври 2023 година досега во Газа убиени се најмалку 51.000 Палестинци, од кои повеќето жени и деца.

Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант поради воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата за неговите постапки во енклавата.