Saadet Gökce
16 Декември 2025•Ажурирај: 17 Декември 2025
АНКАРА (AA) – Австралискиот премиер Ентони Албаниз денес ја посети болницата „Сент Џорџ“ во јужен Сиднеј, каде што се сретна со Ахмед ал Ахмед, човекот кој е прогласен за херој откако разоружа еден од напаѓачите за време на инцидентот на плажата Бонди, јавува Анадолу.
По средбата, Албаниз ја пофали храброста на Ахмед, велејќи дека тој го претставува најдоброто од Австралија.
„Ахмед, ти си австралиски херој. Го стави сопствениот живот во ризик за да спасиш други“, напиша Албаниз на социјалната мрежа X, додавајќи: „Во најлошите моменти го гледаме најдоброто од Австралијците, и токму тоа го видовме во неделата вечер. Во име на секој Австралиец, ти благодарам.“
Зборувајќи за новинарите по посетата на болницата, премиерот изјави дека Австралија нема да дозволи земјата да биде поделена.
„Ова е токму она што терористите го посакуваат, но ние нема да дозволиме нашата земја да се подели“, рече Албаниз.
„Ќе се обединиме, ќе се прифатиме едни со други и ќе го надминеме ова.“
Албаниз се сретнал и со семејството на Ахмед, меѓу кое и со неговите родители од Сирија, Мухамед Фатех ал Ахмед и Малаке, кои дошле во Австралија пред неколку месеци.
„Му се заблагодарив (на Ахмед) за животите што помогна да се спасат и му посакав сѐ најдобро со операцијата што ќе ја изврши утре“, рече тој, додавајќи дека им се заблагодарил и на здравствените работници во болницата „Сент Џорџ“ кои му даваат поддршка.
Ахмед (43) се преселил во Австралија во 2006 година и е татко на две ќерки.
Албаниз, исто така, рече дека вчера го свикал националниот кабинет за да разговараат за законите за оружје во Австралија.
За зајакнувањето на законите за оружје, Албаниз рече: „Размислувањето што ќе се земе предвид вклучува ограничување на бројот на оружје што едно лице може да го поседува, видот на оружје што е легално, дали поседувањето оружје треба да бара австралиско државјанство и забрзување на работата на Националниот регистар на огнено оружје“.
Ахмед го ризикуваше својот живот истрчувајќи кон еден од вооружените напаѓачи, одземајќи му го оружјето, со што го натера да се предаде. Тој е застрелан повеќепати и се здоби со повреди на раката и рамото.
Според австралиската полиција, 50-годишен маж и неговиот 24-годишен син во неделата навечер отворија оган покрај плажата Бонди во Сиднеј, при што загинати се 15 лица, а 42 се повредени и пренесени во болница на лекување.
Еден од двајцата напаѓачи е убиен, додека другиот се здоби со тешки повреди, соопшти полицијата, која го окарактеризира инцидентот како „терористички акт“.
