Ahmet Dursun
01 Мај 2025•Ажурирај: 02 Мај 2025
ТЕХЕРАН (АА) - Одложена е четвртата рунда нуклеарни преговори меѓу Иран и САД, кои требаше да се одржат на 3 мај во Рим, Италија со посредство на Оман, известува Анадолу.
Министерот за надворешни работи на Оман, Бадр ал-Бусаиди, кој посредува во разговорите, во соопштението на својот профил на социјалната мрежа X наведе дека одлуката за одложување е донесена од „логистички причини“.
„Ја презакажавме средбата САД-Иран закажана за сабота, 3 мај, од логистички причини. Новиот датум ќе биде објавен откако ќе се постигне договор меѓу страните“, наведе Бусаиди.
- Преговарачкиот процес меѓу Иран и САД
Американскиот претседател Доналд Трамп, кој еднострано ја повлече својата земја од нуклеарниот договор со Иран во 2018 година, во март испрати писмо до иранскиот лидер, ајатолахот Али Хамнеи, во кое повика на директни нуклеарни преговори со Иран.
Во писмото, во кое имало и закани, Иран одговори преку Оман, најавувајќи дека нема директно да преговараат под закани и притисок и дека се подготвени само за индиректни разговори.
Американскиот претседател Трамп, пак, на 7 април во Белата куќа на средбата со израелскиот премиер Бенјамин Нетанјаху, по кого Меѓународниот кривичен суд издаде налог за приведување за злосторства против човештвото, најави дека ќе има „директни“ разговори меѓу Иран и САД.
Трамп наведе дека „доколку не се постигне договор, Иран ќе биде во голема опасност“.
Иранскиот министер за надворешни работи, Абас Еракчи, истиот ден изјави дека разговорите меѓу Иран и САД ќе се одржат „индиректно“ во Оман. Техеран и Вашингтон одржаа индиректни разговори, прво во Оман на 12 април, потоа во Рим и повторно во Оман, со една недела разлика.
И Иран и САД објавија напредок во преговорите.
Страните се согласија дека четвртата рунда преговори ќе се одржи во Рим на 3 мај.
Во преговорите иранската делегација ја предводи министерот за надворешни работи Еракчи, додека специјалниот претставник на Трамп за Блискиот Исток, Стив Виткоф, ги претставува САД.
