Анкета: Мнозинството Јужнокорејци имаат неповолно мислење за САД, првпат по повеќе од 20 години

За првпат по повеќе од две децении, мнозинството Јужнокорејци имаат неповолно мислење за САД, покажува анкета, јавува Анадолу.

Околу 55 отсто од испитаниците изразиле неповолно мислење за САД, што е пораст во однос на 39 отсто минатата година, според анкетата спроведена од Истражувачкиот центар „Пју“ со седиште во Вашингтон.

Анкетата, објавена вчера, покажа дека 18 отсто од испитаниците имаат „многу неповолно мислење“, што е зголемување од 9 отсто во 2025 година.

Помалку од половина од Јужнокорејците, односно 45 отсто, имаат поволно мислење за САД, што претставува пад од 16 процентни поени во однос на 61 отсто минатата година и пад од 35 процентни поени во споредба со 2018 година, втората година од првиот мандат на американскиот претседател Доналд Трамп, кога изнесувало 80 отсто.

САД имаат распоредено околу 39.000 војници во Јужна Кореја во рамките на одбранбениот договор со Сеул, според Трамп, кој неодамна му нареди на Пентагон да го намали обемот на годишните заеднички воени вежби со Јужна Кореја.

Како одговор, јужнокорејскиот претседател Ли Џе Мјунг повторно ја истакна својата заложба за воена независност од Вашингтон.

Околу шест од десет јужнокорејски возрасни лица, односно 57 отсто, ги сметаат САД за сигурен партнер. Тоа е пад во однос на 83 отсто во 2022 година, за време на администрацијата на Џо Бајден.

Намален е и уделот на Јужнокорејци кои сметаат дека САД ги земаат предвид интересите на земји како нивната при донесувањето одлуки за меѓународната политика. Годинава, 21 отсто од Јужнокорејците сметаат дека САД го прават тоа во голема или во одредена мера, што е пад во однос на 38 отсто во 2023 година.

Уделот на Јужнокорејци кои велат дека Вашингтон во голема или во одредена мера придонесува за мирот и стабилноста во светот, исто така, се намалил, од 74 отсто во 2023 година на 47 отсто годинава.

Само 14 отсто го одобруваат начинот на кој Трамп се справува со царините. Претходно годинава, Трамп се закани дека ќе ги зголеми царините за јужнокорејските стоки на 25 отсто доколку Парламентот на земјата не го одобри предложениот трговски договор.

Јужнокорејскиот Парламент подоцна го одобри договорот.

Околу три четвртини од Јужнокорејците не го одобруваат начинот на кој Трамп се справува со Иран. Меѓу нив, речиси половина, односно 47 отсто, воопшто не го одобруваат.

И покрај понеповолниот став кон Вашингтон годинава, Јужнокорејците и натаму убедливо ги наведуваат САД како најважен сојузник на нивната земја. Овој удел бележи мало намалување во однос на минатата година, од 89 на 84 отсто.