Билансот на убиени Палестинци во израелските напади врз Газа достигна скоро 41.600

АНКАРА (АА) - Израелската армија уби уште 52 Палестинци во нападите во Појасот Газа, со што вкупниот број на загинати од 7 октомври минатата година достигна 41.586, соопшти денес Министерството за здравство во енклавата, јавува Анадолу.

Министерството додаде дека во нападите досега повредени се најмалку 96.210 Палестинци.

„Израелските сили убија 52, а повредени се 118 лица во четири масакри врз семејства во последните 48 часа“, соопшти Министерството.

„Многу луѓе сè уште се заробени под урнатините и на патиштата бидејќи спасувачите не можат да стигнат до нив“, се додава.

Израел ја продолжи својата брутална офанзива врз Појасот Газа по упадот на палестинската група Хамас минатиот 7 октомври, и покрај резолуцијата на Советот за безбедност на Обединетите нации која повикува на итен прекин на огнот.

Блокадата на Газа доведе до сериозен недостиг на храна, чиста вода и лекови, оставајќи голем дел од регионот во урнатини.

Израел се соочува со обвиненија за геноцид пред Меѓународниот суд на правдата, кој нареди ставање крај на воените операции во јужниот град Рафа, каде што над еден милион Палестинци побараа засолниште пред да започне копнената офанзива врз градот на 6 мај.