Во Казахстан започна 20-тата рунда мировни преговори за Сирија

АСТАНА (АА) - Во Астана, главниот град на Казахстан, започна 20-тата рунда мировни преговори за Сирија кои стартуваа во 2017 година на иницијатива на Туркије, Русија и Иран, јавува Анадолу.

Разговорите започнаа со билатерални средби меѓу земјите гаранти во Астана.

Турската делегација ја одржа првата средба со иранската делегација.

Туркије ја претставува делегација предводена од заменик-министерот за надворешни работи Бурак Акчапар. На средбите присуствуваат делегацијата на Русија предводена од заменик-министерот за надворешни работи Михаило Богданов и делегацијата на Иран предводена од советникот на министерот за надворешни работи за политички прашања Али Асгар Хаџи.

Администрацијата во Дамаск ја предводи заменик-министерот за надворешни работи Ајман Сузан, а сириската опозиција ја претставува Ахмет Тума.

Присутни се и делегациите на Јордан, Ирак и Либан, кои имаат статус на набљудувач на состаноците на кои присуствуваше и специјалниот пратеник на ОН за Сирија, Геир О. Педерсен.

На дводневните средби ќе се разговара за променливата регионална ситуација околу Сирија и за последните случувања на тоа поле.

Покрај тоа, на средбата ќе се разговара за прашања, како што се хуманитарната ситуација, обновата на земјата и воспоставувањето услови за враќање на сириските бегалци во нивната земја, како и борбата против тероризмот во Сирија.

Денес се очекува консултативна средба на заменици-министрите за надворешни работи на Туркије, Русија и Иран и сириската администрација за „патоказот“ за нормализација на односите меѓу Сирија и Туркије.

„Во моментов сме заинтересирани за нормализирање на односите меѓу Дамаск и Анкара. Ова е многу важен процес. Сега работиме на 'мапата на патот' на овој процес“, рече рускиот заменик-министер за надворешни работи Богданов.