Во тек е евакуација на северот на Чешка поради големите поплави

ПРАГА (АА) - Поплави зафатија делови од Чешка, особено северниот дел, каде што повеќе од 50.000 домаќинства останаа без струја, а спасувачите се обидуваат да го евакуираат загрозеното население, пренесува Анадолу.

Противпожарната и спасувачката служба на Чешка објави снимка на која се гледаат поплавените области со оштетени куќи и патишта, како и борбата на спасувачките тимови со поплавите и обидите да го спасат цивилното население.

„Мораме да бидеме подготвени за најлоши сценарија. Пред нас е тежок викенд“, предупреди минатата недела чешкиот премиер Петр Фиала.

Чешките власти соопштиле дека едно лице го загубило животот, а осум лица се водат за исчезнати, наведе „Гардијан“.

Ризиците од поплави остануваат критични за реките Одра, Опава, Брана и Новохрадка, особено во подрачјата Јесеники и Пардубице, објави Радио Прага интернационал.

Иако нивото на водата опаѓа во горниот тек на реките, бранот поплави продолжува низводно, загрозувајќи ги пониските области како Ухретице и Хрустовице.

„Во тек е евакуација во Опава, Крнов, Острава, Јесеник, Фридлант и други места. Евакуирани се повеќе од 12.000 луѓе. Во Фридлант е прогласена вонредна состојба“, објави премиерот Петр Фиала на социјалната мрежа Х.

Тој информираше дека од почетокот на поплавите, пожарникарите интервенирале во 7.884 ситуации.

„Опасноста од контаминација на водата и храната при поплави е голема“, предупреди тој и ги повика граѓаните „да ја почитуваат хигиената, да пијат само флаширана вода и да не користат потопена храна“.

Делови од источна и централна Европа се борат со силните поплави кои предизвикаа повеќе смртни случаи и се причина за евакуација на десетици илјади лица, објавија медиумите вчера.

Екстремните врнежи од дожд поради бурата „Борис“ последните денови ги зафатија Романија, Чешка, Полска, Словачка, Унгарија, јужна Германија и делови од Австрија.