Германија го повика рускиот претседател да покаже подготвеност за преговори за мир со Украина

Германскиот министер за надворешни работи Јохан Вадефул денес го повика рускиот претседател Владимир Путин да покаже подготвеност за преговори за мир со Украина откако Путин беше поканет на самитот на Г20 во САД, јавува Анадолу.

Путин мора да „покаже дали постои подготвеност за мир и подготвеност за преговори од руска страна“, рече Вадефул за време на средбата со словачкиот колега Јурај Бланар во главниот град Братислава.

„Секако, најдобар начин тоа да се нагласи е уште од почетокот да се преземат чекори во таа насока“, објави Германската новинска агенција (dpa), повикувајќи се на министерот.

Вадефул доби прашање дали го поддржува условувањето на учеството на Путин на самитот на Г20 во Флорида во декември со согласноста на Москва за делумен прекин на огнот во Црното Море, со цел да се овозможи извоз на украинското жито, кој е нарушен поради тековната војна.

Шефот на германската дипломатија нагласи дека поканата на Путин на самитот на Г20 ќе биде тест за Русија.

Тој рече дека Москва најдобро може да ја покаже својата подготвеност за преговори „со преземање чекори во таа насока уште од почеток“ – на пример, со прогласување прекин на огнот во Црното Море „што би го овозможил итно потребниот извоз на жито“.

- Вадефул: Без извоз на жито се заканува глад -

Ова е важно прашање за земјите производители на жито, како Украина и Русија, но уште поголемо за многу земји од глобалниот Југ, рече Вадефул.

„Таму се заканува глад, се закануваат нови хуманитарни катастрофи, како и натамошна дестабилизација на државите“, рече тој.

Ова би можело да доведе до поголем бран бегалци, раселување и нови вооружени конфликти, предупреди германскиот министер за надворешни работи.

Русија и натаму е членка на Г20, група најголеми индустриски развиени економии и економии во подем. Путин последен пат лично присуствуваше на самитот во 2019 година, пред Русија да ја започне војната против Украина во февруари 2022 година.

Г20 ја сочинуваат 19 земји, Европската Унија и Африканската Унија.