Германскиот канцелар ја отфрли можноста за распоредување војници во Украина

БЕРЛИН (АА) – Германскиот канцелар Олаф Шолц денес ја отфрли можноста за праќање германски војници во Украина и нагласи дека неговата Влада ќе се воздржи од дејства што би можеле да предизвикаат конфликт меѓу НАТО и Русија, јавува Анадолу.

„Не доаѓа предвид да пратиме трупи или германски војници во Украина во моментнава ситуација“, рече Шолц пред пратениците. „Отсекогаш јасно сум го кажувал тоа и тоа останува така.“

Канцеларот го изјави ова за време на парламентарната сесија на прашања и одговори и имаа цел да ја разјаснат позицијата на Берлин откако неодамнешните коментари на министерката за надворешни работи Аналена Баербок доведоа до медиумски шпекулации.

Шолц објасни дека претходните изјави на Баербок за потенцијална мировна улога во Украина, каде што Русија во февруари 2022 година започна војна, очигледно биле погрешно протолкувани од некои медиуми.

„Ја прашаа што би можело да се случи во (идна) мировна фаза, а всушност таа се обиде да одговори на ова без да каже да или не. Затоа што е сосема несоодветно сега да се шпекулира што ќе се случи подоцна во случај на прекин на огнот преку преговори“, рече Шолц.

Германскиот лидер истакна дека политиката на неговата Влада останува непроменета, фокусирајќи се на поддршката на Украина, избегнувајќи секаков вид директна воена конфронтација меѓу НАТО и Русија.

„Ние се согласуваме со министерот за одбрана и министерката за надворешни работи дека мора да направиме сѐ за да осигуриме оваа војна да не стане војна меѓу Русија и НАТО. И затоа за мене не доаѓа предвид праќањето копнени трупи во оваа воена ситуација“, нагласи германскиот канцелар.