Дупка длабока 50 метри предизвика проблеми во тајландскиот главен град Бангкок

ИСТАНБУЛ (AA) – Огромна дупка длабока 50 метри денес го наруши секојдневниот живот во главниот град на Тајланд, Бангкок, пренесува Анадолу.

Според јавниот сервис „Таи ПБС“, дупката „проголтала“ полициско влечно возило и два електрични столба.

Колапсот на патот се случил пред болницата „Ваџира“ во Бангкок, која поради тоа ги суспендирала своите операции на два дена, а оштетувањето се проширило и пред полициската станица „Самсен“.

Тајландскиот премиер Анутин Чарнвиракул изрази загриженост за стабилноста на полициската станица, укажувајќи дека два до три темели на објектот се оштетени.

Првичните проценки покажале дека инцидентот е предизвикан од движење на подземни води што довело до пукање на водоводна цевка на станицата „Ваџира хоспитал“ од јужното продолжение на виолетовата метро линија.

Несреќата се случила околу 7 часот наутро, но, за среќа, нема повредени лица.

Гувернерот на Бангкок, Чадчарт Ситипунт, информираше дека итните и безбедносни мерки во областа вклучуваат исклучување на водоснабдувањето и обезбедување алтернативна дистрибуција на вода за жителите, прекин на струјата и отстранување на електричните линии во близина, како и процена на стабилноста на околните објекти.

Гувернерот, исто така, предупреди дека ситуацијата може да се влоши поради обилните дождови, поради што се исфрла повеќе почва на отворената површина.