Европските земји изразија загриженост поради израелските воздушни напади врз Сирија и повикаа на деескалација

ИСТАНБУЛ / ЖЕНЕВА (АА) - Норвешка, Германија, Франција, Швајцарија и ЕУ денес изразија загриженост поради воздушните напади на Израел врз јужна Сирија, предупредувајќи дека ескалацијата може да ја загрози регионалната стабилност и да ги поткопа напорите за мирна транзиција, известува Анадолу.

„ЕУ е вознемирена од континуираните судири во Сувајда, кои резултираа со многу жртви, и силно го осудува пријавеното насилство врз цивилите“, изјави портпаролот на ЕУ, Ануар Ел Ануни.

„Преодната власт има одговорност да ги деескалира настаните и да го вратат мирот, да обезбеди одговорност за сите злосторства и да продолжат со инклузивна транзиција“, изјави Ел Ануни.

„Поради ескалацијата на нападите на Израел врз сириска територија, ги повикуваме сите надворешни актери целосно да го почитуваат суверенитетот и територијалниот интегритет на Сирија“, додаде тој.

Германија, исто така, ги критикуваше израелските воздушни напади и ги повика сите страни да избегнуваат понатамошна дестабилизација на земјата.

„Ги повикуваме сите страни да се воздржат од преземање чекори што би можеле да ја дестабилизираат Сирија“, изјави за новинарите во Берлин портпаролот на германското Министерство за надворешни работи, Кристијан Вагнер.

„Јасно е дека Сирија не смее да стане играчка на странските сили, дека суверенитетот на Сирија мора да биде заштитен“, нагласи тој.

Портпаролот Вагнер истакна: „Израел мора да има интерес за стабилна Сирија“ и „ефикасна сириска влада што ќе осигура безбедност за сите групи на население низ целата земја“.

„Главен приоритет мора да биде владата во Дамаск да може да дејствува и да осигура безбедност во сите делови на Сирија“, рече тој и додаде:

„За да се постигне сето ова, секако, мора да се вклучат сите групи на население во процесот. Суверенитетот и територијалниот интегритет на Сирија мора да бидат зачувани“.

Франција, од своја страна, изрази „длабока загриженост“ поради „сериозните случувања“ во јужниот регион Сувајда во Сирија и повика на итен прекин на непријателствата.

„Франција ги поддржува напорите на сириската преодна власт и лидерите на регионот Сувајда да се вратат кон дијалог и повикува на траен договор за зајакнување на единството, стабилноста и суверенитетот на Сирија, како и безбедноста на сите Сиријци“, се вели во соопштението на француското Министерство за надворешни работи.

„Злоупотребата насочена врз цивилите, кои Франција цврсто ги осудува, мора да престанат. Примирјето објавено вчера наутро од министерот за одбрана на сириската преодна власт мора да се почитува од сите страни“, се додава во соопштението.

„Длабоко сме загрижени за неодамнешните израелски воздушни напади и зголемените тензии. Ескалацијата ризикува да ги поткопа напорите за мирна транзиција во Сирија“, напиша норвешкиот министер за надворешни работи Еспен Барт Ајде на X.

Тој додаде дека е „вознемирен“ од „ескалацијата на насилството“ во Сирија и ги повика сите актери да покажат „максимална воздржаност“.

Швајцарија изрази слична загриженост во врска со континуираната ескалација на насилството во јужна Сирија и Дамаск и повика на потребата од итен прекин на огнот, почитуван од сите страни.

„Сите страни мора да го почитуваат (меѓународното хуманитарно право) МХП, да обезбедат заштита на цивилите и да продолжат да работат кон инклузивна и мирна транзиција“, објави швајцарското Министерство за надворешни работи на платформата X.

Министерството нагласи дека суверенитетот и територијалниот интегритет на Сирија „мора да се почитуваат“.

Израел денес ги обнови своите воздушни напади во Сувајда, јужна Сирија, во најновото кршење на суверенитетот на земјата. Тел Авив тврди дека нападите имаат за цел да ја заштитат заедницата Друзи во Сирија.

Нападите се случија откако сириската армија распореди сили во покраината за да ја врати безбедноста и да ги заштити цивилите и нивниот имот, по судирите меѓу вооружените групи Друзи и Бедуини во кои загинаа најмалку 30 лица.