Египетски медиуми: Делегациите пристигнаа во Каиро за продолжување на преговорите за прекин на огнот во Газа

КАИРО (АА) - Египетските медиуми денес објавија дека страните кои учествуваат во преговорите за воспоставување прекин на огнот во Појасот Газа пристигнале во Каиро за да продолжат со новата рунда преговори, пренесува Анадолу.

„Делегациите на Хамас, Катар и Соединетите Американски Држави (САД) пристигнаа во Каиро за да продолжат со новата рунда преговори за прекин на огнот во Појасот Газа“, објави египетскиот сервис „Каиро њуз“ без да наведе повеќе детали.

Вчера, висок египетски извор откри за истиот канал дека во тек се интензивни напори да се постигне договор пред муслиманскиот свет месец Рамазан, кој започнува на почетокот на март.

Има значителен напредок во преговорите и се бара праведен договор, наведува истиот извор.

На 24 февруари египетските медиуми објавија дека разговорите на експертско ниво се продолжени во Доха, напоменувајќи дека ќе следат состаноци во Каиро.

Палестинското Министерство за здравство во Газа објави дека бројот на загинати во израелските напади врз Газа во изминатите 24 часа се зголемил за 90 достигнувајќи вкупно 30.410.