Едно лице загина, 173 патници и членови на екипажот спасени по пожар на траект во Индонезија 


Најмалку едно лице загина, а 173 патници и членови на екипажот беа спасени денес откако траект се запали во водите во близина на островот Ломбок, во индонезиската провинција Западна Нуса Тенгара, објавија локалните медиуми, пренесува Анадолу.

Траектот пловел од пристаништето Падангбаи на туристичкиот остров Бали кон пристаништето Лембар на Ломбок кога избувнал пожарот, објави локалниот весник на англиски јазик „Џакарта глоуб“.

Според весникот, повикувајќи се на патници, се чини дека пожарот избувнал во затворено товарно возило што се превезувало на траектот.

Сепак, властите засега не соопштија официјална причина за пожарот.

Ова е втор пожар на траект пријавен во Индонезија во изминатите две недели.