Животот во сирискиот град Хама се враќа во нормала

Животот почна да се нормализира во сириската провинција Хама, која неодамна беше заробена од групите што го соборија режимот на Баас во Сирија, јавува Анадолу.

Во центарот на градот Хама започна дистрибуцијата на леб. Животот се враќа во нормала, полицијата продолжува со својата работа, улиците се исчистени.

Во градот се забележуваат напуштените тенкови на соборената војска на режимот на Баас, а жителите на Хама ги тргнаа од улиците плакатите на Башар ал Асад и неговиот татко Хафез ал Асад.

Жителите го прославија ослободувањето на Хама со собири извикувајќи слогани против Асад и неговото семејство.

Махер ал Масри, жител на Хама, за Анадолу ја сподели својата радост поради ослободувањето на градот, велејќи дека Башар ал Асад следел исти методи како татко му, подложувајќи ги на страдање, прогонство и секакви мачења.

„Наместо да нѐ заштити, сириската армија го направи спротивното. Ја уништи нашата земја и ни ги уби децата. Нема враќање на овој суров режим“, рече Масри.

Тој, исто така, истакна дека Хама не добивала никакви услуги за време на владеењето на Асад, со неасфалтирани улици, постојани прекини на струја и широко распространета корупција.

Масри нагласи дека пропаднатите сили на Асад ги насочиле своите тенкови кон цивилите, бомбардирајќи жени и деца, но изрази надеж за „светла иднина со младите“.

- „Немаше ни вода ни струја“

Мухенед Сефеф, друг жител, рече дека ја напуштиле Хама „поради суровиот режим“.

Сефеф се потсетува дека поминал низ страшни времиња кога режимот и Русија бомбардирале цивили во Хама.

„На почетокот работите беа многу лоши во Хама. Немаше ни вода ни струја. Но сега очекуваме добри работи од нив (антирежимските сили)“.

- „Едвај наоѓавме леб, понекогаш питавме“

Мухамед Кизилбаш, жител на градот, рече дека биле под силен притисок за време на режимот, додавајќи: „Нѐ мачеа. Немавме ни ден ни ноќ, четирипати ме затворија во една година, ни го конфискуваа имотот, едвај наоѓавме леб, понекогаш питавме.“

Тој додаде дека групите што го собориле режимот добро се однесувале со нив по влегувањето во Хама и не вознемирувале никого.

- „Педесет години под режим, Хама беше полна со суровост, угнетување“

Мазен Хариф, жител на Хама, изјави дека тие биле секојдневно понижувани и угнетувани под режимот, велејќи: „Педесет години под режимот, Хама беше полна со угнетување, суровост, корупција и фаворизирање.“

„Државата немаше работа за народот, таа им ја 'цицаше' крвта на граѓанитe”, вели тој.

Хариф, исто така, спомена дека групите што го собориле режимот покажале почит и љубезност кон нив.

- Случувањата во Сирија

По избувнувањето на судирите на 27 ноември меѓу антирежимските групи и силите на режимот на Асад, Башар ал Асад и неговото семејство побегнаа во Русија во неделата откако антирежимските групи ја презедоа контролата врз главниот град Дамаск, означувајќи го падот на режимот на Баас, која беше на власт во Сирија од 1963 година.