ЕРУСАЛИМ (АА) - И покрај договорот за прекин на огнот, израелската армија денес повторно ги предупреди либанските цивили да не се враќаат во своите домови во одредени јужни погранични села, јавува Анадолу.

Портпаролот на израелската армија Авичај Адраи на социјалната мрежа X објави дека на жителите на селата Шебаа, Хабарије, Марџајун, Арнун и други им е забрането да се враќаат до следното известување.

Тој изјави дека секој што ќе влезе во овие области „ќе се изложи на ризик“.

Иако Израел претходно издаде слични предупредувања за над 60 јужни либански села, тој не ги објасни причините за овие ограничувања дури и по прекинот на огнот.

Прекинот на огнот стапи на сила во среда, ставајќи крај на 14-месечните борби меѓу израелската армија и групата Хезболах.

Според условите за прекин на огнот, Израел во фази ќе ги повлече своите сили јужно од границата на Сината линија, а либанската армија ќе ги распореди своите сили во Јужен Либан во рок од 60 дена.

Спроведувањето на договорот треба да го следат Соединетите Американски Држави и Франција.

Либанските здравствени власти објавија дека во израелските напади врз Либан се убиени повеќе од 3.960 луѓе и над 16.500 се повредени, а речиси еден милион се раселени од октомври минатата година.