Ikrame Imane Kouachi
31 Мај 2025•Ажурирај: 02 Јуни 2025
ЕРУСАЛИМ/АНКАРА (АА) - Израелските власти потврдија дека Тел Авив спречил закажана посета на делегација на арапски министри за надворешни работи на Рамала, каде што требало да разговараат за поддршка на воспоставувањето палестинска држава, според весникот „Једиот Ахронот“, јавува Анадолу.
„Планираниот состанок на арапските министри за надворешни работи во Рамала за промовирање на создавање палестинска држава е неприфатлив“, објави весникот изјава на неименуван израелски претставник.
„Израел нема да учествува во никакви чекори насочени кон нарушување на својата безбедност“, додаде тој.
Вчера, Ахмад Маџдалани, член на Извршниот комитет на Палестинската ослободителна организација, за Анадолу изјави дека се очекува утре во Рамала да пристигне делегација на арапски министри.
Во делегацијата се министрите за надворешни работи на Саудиска Арабија, Египет, Јордан, Катар и Обединетите Арапски Емирати. Посетата, која беше одложена од претходен датум, требаше да достави порака за политичка поддршка за палестинското раководство.
Според Маџдалани, посетата требаше да вклучи и средба со палестинскиот претседател Махмуд Абас и други високи претставници. Исто така, имаше за цел да го изрази противењето на арапските и муслиманските земји на израелските постапки во Газа и на Западниот Брег.
Делегацијата, дел од министерскиот комитет формиран на Арапско-исламскиот самит во Ријад, се подготвува и за меѓународна мировна конференција закажана за средината на јуни во Њујорк, предводена од Саудиска Арабија и Франција. Се очекува конференцијата да се фокусира на оживување на напорите за дводржавно решение.
Од почетокот на израелските напади врз Појасот Газа на 7 октомври 2023 година, најмалку 972 Палестинци се убиени, а над 7.000 се повредени во нападите на израелската армија и илегалните еврејски доселеници низ окупираниот Западен Брег, според палестинското Министерство за здравство.
Меѓународниот суд на правдата минатиот јули прогласи дека долгогодишната окупација на палестинските територии од страна на Израел е нелегална и повика на евакуација на сите населби на Западниот Брег и Источен Ерусалим.
