Израелската армија се повлече од градот Тулкарем на Западниот Брег по дводневен упад

КУДС (ЕРУСАЛИМ) (АА) - Израелската армија денес се повлече од градот Тулкарем на Западниот Брег по дводневниот упад во кој се убиени деветмина Палестинци, јавува Анадолу.

Во соопштението на војската се вели дека за време на операцијата во градот биле запленети експлозиви и оружје, приведени осомничени и убиени вооружени лица.

Според локалните здравствени власти, во израелскиот напад се убиени најмалку девет лица, а 19 се повредени.

Во текот на изминатите неколку години израелската војска спроведува редовни рации на Западниот Брег, кои ескалираа со почетокот на војната во Газа на 7 октомври 2023 година. Палестинците, исто така, насилно се напаѓани од илегалните еврејски доселеници.

Според Министерството за здравство, оттогаш се убиени најмалку 834 Палестинци, а над 6.500 се повредени од оган на израелската армија на окупираната територија.