Израелската полиција започна истрага против сопругата на Нетанјаху

ЕРУСАЛИМ (АА) - Израелската полиција планира да покрене истрага против Сара Нетанјаху, сопруга на премиерот Бенјамин Нетанјаху, за наводно вознемирување на сведоци и попречување на правдата, објави денес израелската јавна радиодифузна корпорација, известува Анадолу.

До ова дојде по емитувањето на програмата Увда на Канал 12, во која биле изнесени докази за вмешаноста на Сара Нетанјаху во организирањето протести против Лијат Бен-Ари, обвинителот во судењето на нејзиниот сопруг, и еден од сведоците, Хадас Клајн.

Израелскиот државен обвинител Амит Ајсман и главната обвинителка на Израел, Гали Бахарав-Мијара, доцна во четвртокот потврдија дека полицијата добила инструкции за истрага.

Оваа одлука наиде на критики од членовите на израелската влада, вклучително и министерот за правда Јарив Левин, министерот за национална безбедност Итамар Бен-Гвир и претседателот на Кнесетот Амир Охан. Тие ја обвинија Бахарав-Мијара дека селективно го применува законот од политички причини, нарекувајќи го кривично дело.

Бенјамин Нетанјаху, кој ги негира обвиненијата за корупција, во вторник се појави на суд по шести пат во постапката што започна во 2020 година.