Канада: Три лица се повредени во напад со нож во џамија

МОНТРЕАЛ (АА) - Вчера за време на попладневната молитва во џамија во Монтреал, Канада, три лица се повредени во обида да разоружаат маж кој држел нож во раката, известува Анадолу.

Портпаролот на полицијата во Шатоге за новинарите изјави дека неколку лица се здобиле со полесни повреди, а една од нив е пренесена во болница.

Повредените, на возраст од околу 50-тина години, успеале да го задржат осомничениот додека не дошла полицијата.

Околу 100 мажи, жени и деца биле во културниот центар Мусулман во предградието Шатоге во Монтреал, а администраторот Ричид Амане изјави дека мажот постапувал сомнително откако влегол во џамијата, пренесе CTV News.

Неколку мажи му пришле на осомничениот, а тој ги нападнал, нанесувајќи им исекотини по рацете, а на еден од нив и по телото.

Националниот совет на канадските муслимани (NCCM), најголемата канадска непрофитна муслиманска организација, побарала од заедницата да почека повеќе факти пред да донесат какви било заклучоци.

„Во контакт сме со локалниот центар и ќе дадеме повеќе информации кога ќе бидат достапни. Засега немаме информации за мотивот на инцидентот и ја охрабруваме нашата заедница да не шпекулира додека истрагата е во тек“, се вели во објавата на NCCM на социјалната мрежа X.

На лице место е приведено едно осомничено лице на 24-годишна возраст. Полицијата соопшти дека истражителите го испрашуваат и дека најверојатно ќе биде обвинет, се очекува денес да се појави и пред суд.