Кремљ го поздрави прекинот на огнот меѓу САД и Иран, се надева на директни контакти „во наредните денови“

Кремљ денес го поздрави прекинот на огнот меѓу Вашингтон и Техеран, јавува Анадолу.

„Во контекст на вчерашните прилично остри изјави од различни страни, секако, нѐ израдува веста за прекинот на огнот и ја поздравуваме одлуката да не се продолжува по патот на вооружена ескалација“, изјави за новинарите портпаролот на Кремљ, Дмитриј Песков.

Песков истакна дека Москва се надева дека директните контакти меѓу делегациите на двете земји ќе се случат „во наредните денови“, додавајќи дека секоја страна ќе може да ги брани своите интереси на преговарачката маса.

Трамп синоќа објави дека се согласил „да ги прекине бомбардирањата и нападите врз Иран во период од две недели“.

Тој ја соопшти својата одлука помалку од два часа пред крајниот рок што му го постави на Иран за повторно отворање на Теснецот и прифаќање на договорот, предупредувајќи дека во спротивно земјата ќе се соочи со она што тој го опиша како уништување на „цела една цивилизација“.

Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.