Burç Eruygur
28 Декември 2022•Ажурирај: 29 Декември 2022
ИСТАНБУЛ (АА) – Портпаролот на Кремљ, Дмитри Песков, соопшти дека не може да постои „мировен план“ за Украина доколку таа не го земе предвид „влезот на четирите нови региони во Руската Федерација“, јавува Агенција Анадолија (АА).
„Засега не постои „мировен план“ за Украина, да почнеме со ова… Не може да има „мировен план“ за Украина кој не ја зема предвид денешната реалност – со руската територија, со влезот на четирите нови региони во Русија… Ниту еден план што не ги зема предвид овие реалности не може да се тврди дека е мировен“, рече Песков на брифинг со новинарите.
Четири украински региони, имено Луганск, Доњецк, Запорожје и Херсон, беа приврзани на Москва со претседателски декрет на почетокот на октомври по одржаните референдуми поддржани од Москва, кои беа широко отфрлени од меѓународната заедница.
Истакнувајќи дека патувањето на претседателот Владимир Путин во регионот Псков е откажано поради лошите услови за летање, Песков рече дека Путин се подготвува за контакти со неговиот кинески колега Си Ѓинпинг.
„Можам да потврдам дека се подготвуваат такви контакти и навремено ќе ви кажеме кога и како ќе бидат реализирани“, рече Песков.
Песков ја искоментира и неодамнешната ескалација на тензиите меѓу Србија и Косово, истакнувајќи дека Москва внимателно ја следи ситуацијата и ги поддржува активностите на Белград за ова прашање.
„Ние сме блиски сојузници, имаме многу блиски историски, духовни и други односи со Србија. Се разбира, Русија многу внимателно следи што се случува [на Косово], како се обезбедуваат правата на Србите. И, се разбира, ние го поддржуваме Белград во тие акции што се преземаат“, нагласи Песков.
Тензиите меѓу Косово и Србија ескалираа по приведувањето на поранешниот српски полицаец Дејан Пантиќ под сомнение дека нападнал претставници на изборите.
