Лавров: Доколку Европа ја нападне Русија, војната ќе биде целосно поинаква и многу кратка

Доколку Европа ја нападне Русија, војната што би следувала ќе биде „целосно поинаква“ и „многу кратка“, изјави денес рускиот министер за надворешни работи Сергеј Лавров, јавува Анадолу.

Говорејќи на Меѓународниот младински фестивал во градот Екатеринбург, Лавров рече дека руските власти повеќепати истакнале дека Москва нема намера да ги нападне европските земји и „нема интерес“ да го стори тоа.

„Русија повеќепати кажа дека нема да ги нападнеме западните земји и дека немаме интерес да го сториме тоа. Но доколку Европа, која редовно зборува за подготовка за војна против Русија, ја нападне Руската Федерација, тогаш тоа ќе биде целосно поинаква војна и ќе биде многу кратка“, нагласи тој.

Лавров истакна дека конфронтацијата не е метод на Русија, став што, како што рече, повеќепати бил изнесен од руското раководство, вклучително и лично од претседателот Владимир Путин.

„Западот одамна направи избор во корист на ограничување на Русија“, рече тој, посочувајќи на, како што го опиша, „насилното“ проширување на НАТО кон руските граници.

Рускиот министер, исто така, ги критикуваше изјавите на европските лидери за потребата од подготовка за војна со Русија, велејќи дека ова прашање станало една од главните теми меѓу актуелните европски политички лидери во Брисел.