Мексико: Ураганот „Отис“ усмрти 27 лица, преживеаните се жалат на бавен одговор на властите

МЕКСИКО (АА) - Најмалку 27 лица загинаа, а четири се водат како исчезнати откако ураганот „Отис“ ја погоди Гереро, крајбрежната држава во Источно Мексико, соопшти Владата вчера, пренесува Анадолу.

Преживеаните стануваат очајни поради бавната реакција на Владата и загрижени се дека фокусот ќе биде на поправката на инфраструктурата наместо да им се помага на оние на кои им е најпотребно.

Секретарката за безбедност и цивилна заштита Роса Ичела Родригез претходно изјави дека меѓународните метеоролози не предвиделе како ќе се развива бурата, а она што се случи во вторникот е „нетипично“ и „неверојатно сценарио“.

За 24 часа „Отис“ од тропска бура прерасна во ураган од петта категорија.

Ветрот сериозно ја оштети инфраструктурата, оставајќи делови од населението без комуникација и услуги.

Претседателот на Мексико, Андрес Мануел Лопез Обрадор, итно во среда вечер отпатува од главниот град во Акапулко, познато летувалиште што тешко е погодено од ураганот.

Лопез Обрадор рече дека 80 отсто од хотелите во Акапулко биле погодени.

Ураганот предизвика затворање на патишта, вклучително и автопатот меѓу Мексико Сити и Акапулко, најпрометниот во земјата. Повеќе од половина милион луѓе останаа без струја.

Повеќе од 10.000 војници на Националната гарда се распоредени да им помогнат на жртвите.