Најмалку тројца загинати во воздушни напади за кои Авганистан го обвини Пакистан

Авганистан денес го обвини Пакистан дека извршил воздушни напади врз неговите источни провинции Кунар и Пактика, при што загинале најмалку три лица, а неколку други биле повредени, јавува Анадолу.

Хамдулах Фитрат, заменик-портпарол на авганистанската Влада, во објава на американската платформа за социјални медиуми Х соопшти дека воздушен напад бил извршен околу 3 часот по локално време (22:30 GMT во неделата) во областа Нургал во провинцијата Кунар, при што загинале три лица, а неколку други биле повредени.

„Во најмалку два воздушни напади била погодена областа Бармал во провинцијата Пактика“, рече Фитрат, додавајќи дека нема пријавени жртви.

Исламабад веднаш не одговори на тврдењата на Кабул.

Нападите се случуваат во услови на нов бран милитантни напади, вклучително и самоубиствени бомбашки напади во северозападен Пакистан, во кои во изминатите неколку дена загинаа десетици припадници на безбедносните сили и цивили.

Исламабад го обвинува Кабул за поддршка на милитантите кои извршуваат „терористички“ напади во Пакистан. Авганистан го отфрла ова обвинување.