Fatma Zehra Solmaz
28 Септември 2026•Ажурирано: 28 Септември 2026
Осум американски маринци биле повредени пред две недели кога иранска противбродска крстосувачка ракета погодила пловен објект на кој биле ангажирани во Ормускиот Теснец, објави во неделата „Ен-би-ес њус“, повикувајќи се на изјавите на тројца американски претставници, пренесува Анадолу.
Според наводите, маринците не биле сериозно повредени, но претрпеле вдишување чад и можни трауматски повреди на мозокот, откако почувствувале симптоми слични на потрес на мозокот, вклучително и главоболки.
Седуммина од маринците биле припадници на војската без офицерски чин, додека осмиот бил офицер. Според претставниците, сите осум се вратиле на должност кратко по нападот на 14 септември.
Маринците биле ангажирани како дел од борбен тим за десант кога иранската ракета го погодила пловниот објект, рекоа тие.
Претставниците рекоа дека пловниот објект не бил брод на американската морнарица, но одбиле да го прецизираат неговиот тип, нарекувајќи го само поморски пловен објект.
Пентагон се соочува со зголемено внимание во врска со податоците за жртвите откако во февруари започна војната меѓу САД, Израел и Иран, при што бројот на повредени и загинати припадници на американските сили подлежи на промени во известувањето и класификацијата.
Заклучно со средата, Системот за анализа на воени жртви на Пентагон (DCAS) евидентирал 861 повреден припадник на американските вооружени сили во конфликтот.
Осумтемина маринци биле додадени во базата на податоци речиси 10 дена по нападот на 14 септември, додека американски претставник го припишал доцнењето во пријавувањето на симптомите што може да се појават подоцна и на тоа што системот не се ажурира во реално време.
