Поранешниот претседател на Европскиот совет: Шефот на НАТО треба да работи за единство, а не да биде „американски агент“

ЛОНДОН (АА) - Поранешниот претседател на Европскиот совет денес го критикуваше генералниот секретар на НАТО, Марк Руте, за како што го нарече, неговиот „ласкав пристап“ кон американскиот претседател Доналд Трамп, велејќи дека не очекува шефот на Алијансата да биде „американски агент“, пренесува Анадолу.

„'Ласкавиот пристап' на генералниот секретар Руте кон Трамп нема да функционира и би можело да доведе до тотален неуспех“, изјави Шарл Мишел за време на утринската емисија „Европа денес“ на „Евроњуз“.

Тој посочи дека Руте треба да престане да биде „американски агент“ и да го обедини НАТО во услови на, како што ги нарече, „непријателска реторика“ и „заплашување“ од страна на САД.

„Не очекувам Марк Руте да биде американски агент. Очекувам Марк да работи за единство во рамките на НАТО“, рече Мишел, кој беше претседател на Европскиот совет од 2019 до 2024 година.

„Сакам да бидам јасен, Марк Руте разочарува и ја губам довербата во него“, додаде тој.

Руте се најде на нишан на критики откако ја отфрли идејата Европа сама да се брани, во своето обраќање пред Комитетот за надворешни работи и Комитетот за безбедност и одбрана на Европскиот парламент во Брисел, во понеделникот.

„Ако некој овде мисли дека Европската Унија, или Европа во целина, може да се брани без САД, продолжете да сонувате. Не можете. Не можеме“, изјави Руте.

Мишел рече дека Европа се соочува со „заплашување“ и „закани“, додавајќи дека „она што се случува со Гренланд не е прифатливо“ и дека очекува Руте силно да го брани единството на НАТО.

Тој потсети дека осум европски земји биле изложени на закани со царини од Трамп поради прашањето за Гренланд на почетокот на јануари.

Европската Унија е „многу лојален партнер“ на САД и „не заслужува“ вакво однесување од американскиот претседател, истакна Мишел.

На прашањето за целта на украинскиот претседател Владимир Зеленски, Украина да стане членка на ЕУ до 2027 година како дел од мировниот план, Мишел одговори:

„Тоа е апсолутно исправно и е возможно.“

Тој повика и на интеграција на Киев во Унијата „што е можно побрзо“.