Потврдено е дека во револверот што Болдвин го користел на снимањето имало вистински куршуми

ВАШИНГТОН

Во реквизитното оружје со кое холивудскиот актер Алек Болдвин (68) за време на филмскиот сет во Ново Мексико ја застрела директорката на фотографија Халина Хачинс (42) и го рани режисерот Џоел Соуза (48) имало вистински куршуми, известува Агенција Анадолија (АА).

Според судскиот записник, Алек Болдвин изјавил дека помошникот на режисерот му го дал револверот и му рекол дека е „безбеден“.

Во записникот се наведува дека помошник-режисерот во својата изјава рекол дека не знаел дека во револверот има „вистински куршуми“.

Се истакнува дека крвавата облека на Болдвин е земена како доказ, заедно со предметниот револвер, а полицијата го запленила и остатокот од оружјето и опремата што се користат на филмското снимање.

Болдвин е пуштен по дадениот исказ во полицијата, а сѐ уште никој не е обвинет за убиството и ранувањето.

„Нема зборови со кои може да се опише мојот шок и тага поради трагичниот настан што ѝ го одзеде животот на Халина Хачинс, сопруга, мајка и наша колешка на која ѝ се восхитувавме“, напиша Болдвин на друштвените мрежи.

Тој додаде дека срцето му е скршено поради нејзиниот сопруг, синот и сите оние што ја познавале и сакале Халина.

Хачинс (42) беше директорка на фотографија во филмот „’Рѓа“ што се снимаше во сојузната американска држава Ново Мексико. Режисерот Џоел Соуза (48) е ранет, но нема информации за неговата здравствена состојба. Соопштено е дека му е укажана помош и дека е отпуштен од болница.