Elena Teslova
02 Декември 2025•Ажурирај: 03 Декември 2025
МОСКВА (АА) – Рускиот претседател Владимир Путин вчера го посети боиштето во Украина, соопшти Кремљ, јавува Анадолу.
Според соопштението, Путин добил извештаи од началникот на Генералштабот, Валериј Герасимов, како и од командантите на Централната група, Валериј Солодчук, и на групата Восток, Андреј Иванаев.
Путин бил информиран за ситуацијата на фронтот. Рускиот воен врв тврди дека градовите Покровск во областа Доњецк и Волчанск во областа на Харков паднале под руска контрола.
Претседателот им се заблагодари на командантите и војниците, истакнувајќи ја важноста на резултатите постигнати во реонот на Покровск.
„Ова ќе овозможи доследно исполнување на сите главни задачи кои ни беа поставени на почетокот на специјалната воена операција“, рече тој.
Герасимов, пак, извести дека украинските сили се обидуваат да ги деблокираат своите опколени групи во насока кон Купјанск и Покровск, како и дека започнале контраофанзиви на други делови од фронтот.
Командантот на групата Восток, Андреј Иванаев, извести за напредокот во регионите Запорожје и Днепропетровск. Тој тврди дека руските сили влегле во градот Хулијаиполе и ја освоиле населбата Добропилија.
Украинскиот претседател Владимир Зеленски претходно потврди дека ситуацијата во областите за кои зборува рускиот воен врв останува „најтензична“.
Коментирајќи за Покровск, Зеленски рече: „Никој не ги тера (војниците) да умираат за урнатини. Ќе ги поддржам војниците таму, особено командантите, во тоа како да ја контролираат состојбата.“
Според него, со преземањето на Покровск, Русија ќе се обиде да го убеди американскиот претседател Доналд Трамп дека Украина треба да се откаже од Донбас за да се стави крај на конфликтот.
Но Зеленски нагласи дека Киев не може да се откаже од регионот: „Никој нема да го прифати тоа, народот нема да го прифати.“
