Путин: „Последните парламентарни избори во Сирија ќе ги зајакнат врските меѓу сите политички сили во земјата“

ИСТАНБУЛ (АА) – Рускиот претседател Владимир Путин денес изјави дека неодамнешните парламентарни избори во Сирија ќе придонесат за зајакнување на врските и дијалогот меѓу сите политички сили во земјата, јавува Анадолу.

„И покрај тоа што Сирија поминува низ тешки времиња, изборите ќе помогнат во зацврстување на врските и соработката меѓу сите политички сили“, рече Путин на почетокот од средбата со сирискиот претседател Ахмад ал-Шара во Москва.

Ал-Шара пристигна во руската престолнина денес, според сириските медиуми, во негова прва официјална посета на Русија откако ја презеде функцијата во декември 2024 година, по смената на режимот на Башар ал-Асад.

Еден ден по неговото соборување од власт, Кремљ соопшти дека на Асад и неговото семејство им е даден азил во Русија.

Изјавувајќи дека Русија отсекогаш се водела од интересите на сирискиот народ во своите односи со земјата, Путин рече дека врските меѓу Москва и Дамаск отсекогаш биле „исклучиво пријателски“.

Рускиот претседател ги оцени парламентарните избори во Сирија како „голем успех“ и изјави дека тие ќе придонесат за „консолидација на општеството“.

Тој потсети дека меѓувладината комисија меѓу Русија и Сирија, која работи уште од 1993 година, повторно ја продолжува својата работа.

Путин се заблагодари и за гостопримството за време на неодамнешната посета на руската делегација предводена од заменик-премиерот Александар Новак во Дамаск, нагласувајќи дека за време на посетата биле предложени „многу интересни и корисни иницијативи“.

„Русија е подготвена да направи сè што е можно за нивна реализација, како и за одржување на редовни контакти и консултации преку Министерството за надворешни работи“, додаде Путин.