Трамп по средбата со Путин: Сега останува на Зеленски и европските лидери „да го завршат тоа“

ВАШИНГТОН (АА) - Американскиот претседател Доналд Трамп изјави дека по средбата со неговиот руски колега, Владимир Путин, сега е до украинскиот претседател Володимир Зеленски и европските лидери „да го завршат тоа“, пренесува Анадолу.

„Беше постигнат договор околу повеќе точки, не толку многу, знаете, една или две прилично значајни точки, но мислам дека може да се постигнат“, рече Трамп за време на интервјуто за Фокс њуз по неговиот историски состанок со Путин на Алјаска.

„Сега, навистина е до претседателот Зеленски да го оствари тоа. И би рекол и дека европските земји мора малку да се вклучат, но тоа зависи од претседателот Зеленски“, додаде тој.

Трамп и Путин беа оптимисти по нивните над тричасовни разговори зад затворени врати, при што рускиот лидер рече дека дошле за да постигнат „разбирање“.

Спецификите на рамката на договорот не се сеуште достапни и не е јасно кои прашања остануваат отворени по разговорите.

Клучни точки пред состанокот останаа контроверзните размени на територии меѓу Русија и Украина, што Зеленски го отфрли, како и какви видови безбедносни гаранции можат да му се обезбедат на Киев за да се осигури дека Русија нема да се врати во војна против својот источноевропски сосед.

Трамп рече дека ќе биде „закажан“ трилатерален состанок меѓу него, Зеленски и Путин. Американскиот претседател немаше цврст временски рок кога тоа би се случило, но рече дека ќе се случи во „прилично краток“ рок.

„И двајцата сакаат да бидам таму, ќе бидам таму“, рече Трамп за Зеленски и Путин.