КВИНСЛЕНД (АА) - Тропскиот циклон Алфред вчера почна да го зафаќа источното крајбрежје на Австралија, со поројни врнежи од дожд и рекордно високи бранови во густо населениот регион што ретко го зафаќаат вакви бури, јавува Анадолу.

Претходно властите издадоа наредби за евакуација на испаничените граѓани додека тропскиот циклон Алфред се приближуваше до источниот брег на Австралија.

Државната служба за итни случаи на Нов Јужен Велс синоќа ги повика жителите од подрачјето на Северни Реки да се евакуираат до 21 часот по локално време бидејќи брзото издигнување на нивото на реката и огромните врнежи се очекува да предизвикаат големи поплави.

Во моментов се отворени 15 центри за евакуација во северниот дел на Нов Јужен Велс, се вели во соопштението на помошничката комесар Никол Хоган од Командата на државната служба за вонредни состојби.

Додавајќи дека повеќе од 300.000 вреќи со песок се дистрибуирани до членовите на заедницата што ги подготвуваат своите домови и бизниси за претстојните тешки временски услови, таа предупреди: „Ако останете во областа, може да немате струја, вода и други основни услови.“

Хоган, исто така, предупреди дека може да стане премногу опасно за службите за итни случаи да ги спроведуваат акциите за спасување, а објектите може да не ги издржат поплавите.

„Треба да се евакуирате за да останете со семејството, пријателите во алтернативно сместување во областите што не се погодени од поплави. Ако не можете да најдете сместување, центри за евакуација се отворени низ целиот регион“, истакна таа.

Жителите во југоисточниот дел на Квинсленд и североисточниот дел на Нов Јужен Велс се подготвуваат за циклонот, со интензитет каков што не е забележан во регионот од 1974 година.

Се очекува циклонот Алфред да остане „на повисокиот крај“ од категоријата 2 и денес да се спушти на копното во раните утрински часови, носејќи повеќе од половина метар дожд и деструктивни ветрови во големи делови на Квинсленд и Нов Јужен Велс.

Над 4 милиони жители на Бризбејн, Голд Коуст, Саншајн Коуст и други градови на Квинсленд и Нов Јужен Велс добија официјално предупредување од Бирото за метеорологија.

Повеќето аеродроми во подрачјето се затворени до понатамошно известување, а прекинат е и јавниот превоз.