Четири лица загинаа, деветмина се повредени во пукање во средно училиште на југот на Филипините

Најмалку четири лица загинаа, а деветмина се повредени во пукање што се случи рано утринава во Средното училиште „Атенео де Замбоанга“ во градот Замбоанга, на јужниот дел на Филипините, меѓу кои е и наводниот напаѓач, објави локалниот медиум „Манила тајмс“, јавува Анадолу.

Инцидентот се случил непосредно пред почетокот на наставата, соопшти полицијата.

Националното биро за истраги соопшти дека во пукањето загинале двајца ученици и двајца обезбедувачи, додека девет лица се повредени. Идентитетите на жртвите не се објавени.

Според известувањата, напаѓачот е идентификуван како машко лице и ученик во четврта година во средното училиште, чиј татко наводно работел во Царинската служба на градот Замбоанга.

Властите соопштија дека осомничениот донел пиштол и пушка во училиштето и отворил оган во училница „без очигледна провокација“.

Градоначалникот на Замбоанга, Кајмер Адан Оласо, изјави дека наводниот напаѓач и жртвите биле ученици во приватното училиште кое го водат језуити.

На видеоснимките се гледаат ученици како бегаат од училишната зграда додека се слуша истрел.

Полицијата и истражителите остануваат на местото на настанот додека властите го утврдуваат мотивот и ги испитуваат можните пропусти во безбедноста.