Шпанија се закани со реципрочни мерки доколку Италија не ги укине граничните контроли

Шпанија денес упати закани дека ќе преземе „пропорционални мерки“ против Италија доколку Рим не ги укине привремените гранични контроли воведени по масовното преминување на мигранти во шпанската енклава Сеута минатата недела, јавува Анадолу.

Во соопштение доставено до шпанските медиуми, Владата на Шпанија оцени дека одлуката на Италија повторно да воведе гранични проверки со Шпанија е „неоправдана“ и „без преседан во поновата историја“, наведувајќи дека мерката била воведена еднострано и без претходна најава.

Мадрид ѝ даде рок на Италија до недела да ги укине контролите.

„Доколку тоа не биде направено до крајот на недела, 9 август, Шпанија ќе биде принудена да преземе пропорционални мерки за заштита на интересите и достоинството на своите граѓани“, се наведува во соопштението.

Шпанската Влада оценува дека мерките го нарушиле патувањето на илјадници патници во екот на летната туристичка сезона и создале правна несигурност.

Мадрид, исто така, се спротивстави на образложението на Италија дека контролите се неопходни поради миграциската криза во Сеута, нагласувајќи дека енклавата има посебен статус во рамките на Шенгенскиот систем и дека мигрантите кои влегуваат таму не можат слободно да се движат во Шенген-зоната.

Во соопштението се додава дека „огромното мнозинство“ од околу 72.000 мигранти кои влегле во Сеута за време на масовното преминување на 30 јули веќе се вратиле во Мароко.

Шпанската Влада ја критикуваше и миграциската состојба во Италија, наведувајќи дека, според податоците на европската агенција за гранична и крајбрежна стража Фронтекс, Италија во последните години регистрирала двојно повеќе нерегуларни преминувања на границата од Шпанија, а сепак Шпанија никогаш не вовела гранични контроли кон Италија.

Премиерот Педро Санчез денес одржа координативен состанок со повеќе министри за да ја разгледа ситуацијата.

Во соопштението се повикува Владата на италијанската премиерка Џорџа Мелони да ги укине контролите и „да ги третира Шпанците како и останатите европски граѓани“.

„Веруваме дека европските вредности, здравиот разум и добрата волја ќе преовладаат“, се наведува во соопштението, во кое Италија се обвинува дека создава непотребни поделби поради внатрешнополитички и изборни причини.

Според најновите владини податоци, досега се пронајдени телата на 80 мигранти кои загинале за време на масовното преминување.

Властите, исто така, регистрирале 1.342 деца мигранти без придружба во прифатниот систем во Сеута, иако министерката за млади и деца Сира Рего изјави дека реалниот број најверојатно е поголем, бидејќи многу малолетници сè уште не се формално идентификувани и евидентирани.