Аеродромот „Истанбул“ и понатаму најфреквентен во Европа со 1.587 лета дневно

Аеродромот „Истанбул“ останува најфреквентен аеродром во Европа, со просек од 1.587 лета дневно во периодот од 21 до 27 септември, според податоците на Европската агенција за безбедност на воздушната пловидба (ЕВРОКОНТРОЛ), пренесува Анадолу.

Најновиот извештај на агенцијата за состојбата во европската авијација покажа дека аеродромот „Истанбул“ е лидер во регионот според вкупниот број на пристигнувања и заминувања.

По него се аеродромот „Схипхол“ во Амстердам со 1.423 дневни лета, пред парискиот „Шарл де Гол“ со 1.384, Франкфурт со 1.359 и лондонскиот „Хитроу“ со 1.324 лета.

Сообраќајот на аеродромот „Истанбул“ забележа пад од 1% во однос на претходната недела поради послабите активности на домашните летови, а остана главно непроменет во споредба со истиот период од претходната година.

Министерот за транспорт и инфраструктура на Турција, Абдулкадир Уралоглу, денес преку објава на социјалните мрежи го посочи ова рангирање, наведувајќи дека аеродромот „Истанбул“ продолжува да ја задржува својата водечка позиција во Европа.

Тој истакна дека Турција продолжува да ја зајакнува инфраструктурата што го позиционира Истанбул како еден од клучните светски центри за воздушен сообраќај.

Извештајот, исто така, го рангираше аеродромот „Истанбул“ на седмо место во светот според просечниот број на дневни заминувања, а Амстердам се најде на десетто место.

На ниво на европската мрежа, просечниот број на дневни летови според периодот во извештајот изнесува 35.279, што претставува пад од 1,1% во однос на претходната недела, но и пораст од 2,9% на годишно ниво.