ИСТАНБУЛ (АА) - Според податоците на меѓународните институции, Туркије отсекогаш била земја која дава најмногу хуманитарна помош во светот, изјави шефот на Турската фондација „Дијанет“, јавува Агенција Анадолија (АА).
Изани Туран, генерален директор на турската фондација, која е поврзана со Управата за верски прашања на Туркије, рече дека Туркије ќе продолжи да биде најхуманитарна земја.
Според неодамнешниот извештај на Иницијативи за развој (DI), глобална организација со седиште во Велика Британија која ја користи моќта на податоците и доказите за ставање крај на сиромаштијата, намалување на нееднаквоста и зголемување на отпорноста, Туркије минатата година потрошила 5,59 милијарди долари хуманитарна помош, што претставува 0,86 отсто од нејзиниот бруто домашен производ (БДП).
Туркије има најголем удел во својот БДП меѓу сите донатори на помош, потоа следуваат Обединетите Арапски Емирати (0,21 отсто), Луксембург (0,18 отсто), Шведска (0,16 отсто) и Норвешка (0,15 отсто).
„Овој успех несомнено е постигнат со довербата на турскиот народ во државата и невладините организации“, изјави Туран за АА.
Во текот на изминатите години, Туркије се фокусира на сиромашните региони и обезбедува хуманитарна помош во форма на храна, образовни капацитети и материјал и сместување.
Во северната сириска област Идлиб, земјата изгради речиси 100.000 куќи од брикети, а претседателот Реџеп Таип Ердоган постави нова цел од 250.000 куќи.
Туркије е домаќин на околу 4 милиони бегалци, обезбедувајќи заштита на повеќе бегалци од која било друга земја во светот. Бројот на Сиријци под привремена заштита во Туркије изнесува вкупно 3,75 милиони.
Земјата, исто така, спроведува хуманитарна помош во Африка и Азија, вклучувајќи медицински операции и земјоделска поддршка.
Во меѓувреме, САД од својот БДП обезбедија најголем износ на хуманитарна помош во 2021 година од 9,77 милијарди долари или 0,04 отсто, а потоа следуваат Туркије, Германија (3,17 милијарди долари), Велика Британија (1,6 милијарди долари) и Јапонија (1,2 милијарди долари).
Туркије беше рангирана на третото место во извештајот на ДИ во 2013, 2014 и 2015 година, второ во 2016 и 2020 година и прво во 2017, 2018 и 2019 година.
Минатата година Јемен беше најголемиот примател на хуманитарна помош со 2,73 милијарди долари, потоа Сирија (2,14 милијарди долари), Авганистан (1,76 милијарди долари), Етиопија (1,56 милијарди долари) и Јужен Судан (1,29 милијарди долари).
Велејќи дека ТДВ е една од најважните алки на синџирот за хуманитарна помош во Туркије, Туран нагласи дека Фондацијата е активна во 149 земји со храна, сместување, образование и социјална поддршка.
„Со над 1.000 филијали и 31.385 волонтерски персонал, Фондацијата обезбеди огромно количество помош за време на муслиманските празници Рамазан бајрам и Курбан бајрам оваа година“, рече тој.
„Во светиот месец Рамазан, Фондацијата собра 139 милиони турски лири (7,8 милиони долари) и обезбеди храна и облека за 2,15 милиони луѓе во Турција и во странство“, додаде тој.
„Благодарение на донациите, Фондацијата на Курбан бајрам обезбеди месо за речиси 22 милиони луѓе низ светот“, рече Туран.
„Фондацијата, исто така, досега обезбеди парична помош и за кризните региони како Сирија (21,5 милиони долари), Палестина (13,34 милиони долари), Јемен (2,37 милиони долари), Ракин-Мјанмар (2,22 милиони долари), Судан (2,1 милион долари), Либан (448.500 долари) и Индонезија (325.048 долари)“, објасни тој.
„Фондацијата во Сирија планира да изгради 14.673 куќи од тули, а 6.214 од нив досега се завршени“, рече менаџерот.
Извештајот на ДИ покажа дека моментално 306 милиони луѓе низ светот имаат потреба од хуманитарна помош.
„Минатата година, износот на помошта од сите земји беше 31,3 милијарди долари, што е зголемување од 30,6 милијарди долари во 2020 година“, се вели во извештајот.
