Ердоган упати честитки по повод 19 Мај, Денот на сеќавање на Ататурк и Денот на млади и спорт

ИСТАНБУЛ (АА) – Турскиот претседател Реџеп Таип Ердоган денес упати честитки по повод 19 Мај, Денот на младите и спортот, кој воедно е и Ден на сеќавање на првиот претседател на модерна Туркије, Мустафа Кемал Ататурк, јавува Анадолу.

„Датумот 19 мај 1919 година, кој на турската младина ѝ го подари Гази Мустафа Кемал, е симбол на оживувањето на духот на отпорот на нашите предци со голема верба, иако соочени со тешкотии“, рече Ердоган.

Истакна дека 19 мај е ден кога турската нација почна да пишува еден од најголемите херојски епови што историјата го има видено, порачувајќи дека нема да потклекне на угнетувањето, единствена и солидарна против империјалистичките сили.

„Најмногу ѝ веруваме на нашата младина кога го осмислуваме и имплементираме напредокот во демократијата и развојот на нашата земја“, рече тој.

Како што Туркије се развива и расте, „ќе им даде поголема поддршка на младите за да можат да ги остварат своите соништа“, нагласи Ердоган.

„Со овие мисли уште еднаш им го честитам на сите 19 Мај, Денот на сеќавање на Ататурк, Денот на младите и спортот, и им оддавам почит на сите херои од нашата Војна за независност, а особено на Гази Мустафа Кемал“, додаде тој.

Инаку, на 19 мај 1919 година Мустафа Кемал Ататурк ја започна борбата за независност на својот народ и ги постави темелите на денешна Република Туркије. Затоа 19 мај е исклучително важен празник во земјата.

Денот на младите и спортот се одбележува со различни манифестации и во другите земји во светот каде што живее турската дијаспора.