ДАМАСК (АА) – Координацијата и интеграцијата на граничните премини меѓу Турција и Сирија напредуваат забрзано, а договорот за транзитен транспорт ќе стане целосно оперативен во текот на овој месец, изјави Мазен Алуш, директор за односи со јавноста во Сириската генерална управа за копнени и морски пристаништа.
„Се состануваме со турските претставници речиси секоја недела. Кога ќе се појави проблем, воспоставуваме меѓусебна комуникација и го решаваме во рамките на нашите можности“, изјави Алуш за Анадолу.
Тој изрази благодарност за поддршката што Анкара му ја пружа на Дамаск „од ослободувањето наваму“, додавајќи дека соработката продолжува во областите на трговијата, транспортот и управувањето со границите.
Алуш нагласи дека почнува имплементацијата на договорот за транзитен транспорт потпишан во Истанбул во август, со што системот на претовар на стоките ќе биде укинат во ноември.
Тој рече дека визите за сириските возачи ќе се издаваат преку турскиот Конзулат во Алепо во рок од 10 дена, а турските возачи ќе можат да добијат визи директно на граничниот премин.
Алуш нагласи дека турските власти неодамна донеле прелиминарна одлука со која ќе им се дозволи на Сиријците со двојно државјанство да влегуваат во Турција со возила со сириски таблички, додавајќи дека примената на оваа мерка ќе започне наскоро.
Посочувајќи дека сирискиот транспортен сектор ќе се развива во наредниот период, Алуш рече дека целта е сириските возачи повторно да можат по копнен пат преку Турција да стигнат до Русија, Грузија, Украина, Европа и земјите од Заливот.
Алуш додаде дека на Меѓународниот аеродром во Дамаск неодамна биле инсталирани нови радарски системи, кои овозможуваат полетување и слетување на авиони и во ноќни услови.
Тој истакна дека хуманитарните конвои минуваат низ Турција без никакви проблеми и дека Анкара обезбедила значителни олеснувања во тој поглед.
„Нашите турски браќа продолжуваат да ја поддржуваат Сирија колку што можат“, изјави тој.
Алуш додаде дека на Меѓународниот аеродром во Дамаск неодамна биле инсталирани нови радарски системи, кои овозможуваат полетување и слетување на авиони и во ноќни услови.
Тој истакна дека хуманитарните конвои минуваат низ Турција без никакви проблеми и дека Анкара обезбедила значителни олеснувања во тој поглед.
- 110.000 контејнери обработени во пристаништата
Осврнувајќи се на постигнатото откако Сирија беше „ослободена од режимот на Баас“ на 8 декември 2024 година, Алуш рече дека сите копнени и морски гранични премини биле уништени.
Тој објасни дека граничните премини Насиб (со Јордан) и новоотворениот Тијас (со Либан), како и пристаништата Латакија и Тартус, повторно се ставени во функција.
„Инфраструктурата и електронските системи на овие премини се целосно обновени. Досега се увезени повеќе од три милиони тони гориво“, рече Алуш.
Од 8 декември досега, во пристаништето Латакија влегле и излегле 333 брода, а во Тартус повеќе од 700. Вкупно се обработени 110.000 контејнери.
„Главните извозни производи се фосфат и жив добиток, додека други производи се извезуваат во ограничени количини“, додаде тој.
Тој нагласи дека нема пречки за увоз и дека сите легални производи може да се внесуваат во земјата.
- Корупцијата и шверцот се сузбиени -
Алуш истакна дека во пристаништата за време на поранешниот режим биле распространети корупција, мито и шверц, но дека тој систем целосно е елиминиран.
„Сите услуги се бесплатни, а строго е забрането да се даваат подароци или поткупи на службени лица“, рече тој.
Тој додаде дека Сирија успеала да ја прекине рутата за шверц на наркотици што започнувала од граничниот премин Насиб и дека спречила повеќе од пет големи пратки.
Осврнувајќи се на копнените премини со Турција, Алуш потсети дека дозволите за посета за Сиријците под привремена заштита се привремено суспендирани од страна на Турција, нагласувајќи дека прашањето е „хуманитарно“ и дека се работи на решение.
За обидите за шверц од либанската граница, рече дека биле распоредени К9 тимови со кучиња за детекција и современи системи за скенирање на сите гранични премини.
Тој нагласи дека е забрзана модернизацијата на системите за скенирање, кои не работеа или не постоеја за време на соборениот режим, велејќи дека 20 нови апарати стапуваат во употреба, а сите гранични премини ќе имаат технологија од светска класа.
Осврнувајќи се на копнените премини со Турција, Алуш потсети дека дозволите за посета за Сиријците под привремена заштита се привремено суспендирани од страна на Турција, нагласувајќи дека прашањето е „хуманитарно“ и дека се работи на решение.
Тој додаде дека делумно решение е воведено за Сиријците со двојно државјанство кои сакаат да ги донесат своите возила во земјата, истакнувајќи дека доволно е да се приложи доказ за сириско државјанство – дури и истечен пасош се прифаќа.
Безбедносниот депозит за влез на возила, кој претходно изнесувал 50 долари, сега е намален на 15 долари, што Алуш го оцени како значителен чекор за олеснување на граничните процедури.
„Нашите порти се широко отворени за нашиот народ. На урнатините од старите премини градиме модерни меѓународни транзитни коридори. Наредната година сите граници на Сирија ќе бидат целосно опремени, економски активни и ќе функционираат според единствен стандард“, додаде Алуш.
