Gizem Nisa Çebi
14 Септември 2024•Ажурирај: 16 Септември 2024
АЈДИН (АА) – Во југозападна Туркије се одржа комеморација и погребна церемонија за турско-американската активистка Ајшенур Езги Ејги убиена на 6 септември од страна на израелски војници на Западниот Брег, јавува Анадолу.
За време на церемонијата во домот на Ајшенур Езги Ејги во егејскиот крајбрежен град Дидим, во Ајдин, беа упатени молитви за младата девојка, која го загуби животот на 26-годишна возраст.
Нејзиното тело е донесено во нејзината семејна куќа во населбата Алтинкум. Таткото на Ејги, Мехмет Суат Ејги, нејзиниот сопруг со пакистанско потекло Хамид Мазхар Али и група роднини беа придружувани од Махинур Оздемир Ѓокташ, турскиот министер за семејство и социјални услуги.
Турскиот министер за правда, Јилмаз Тунч, исто така, го посети семејството за да изрази сочувство.
По молитвата во семејната куќа, нејзиното тело е однесено во Централната џамија во Дидим за погребна церемонија.
По молитвата, луѓето се собраа пред куќата и извикуваа „Смрт за Израел“.
Ејги ќе биде погребана по пладневната молитва во централната џамија во Дидим.
- Смртно застрелана за време на мирен протест -
Пред нејзината смрт, Ејги отпатувала на Западниот Брег за да го поддржи палестинскиот отпор против израелската окупација, според извештаите на Меѓународното движење за солидарност.
На 3 септември, Ејги отишла да набљудува протест во градот Бејта во Наблус, и да застане против илегалните еврејски населби таму.
Движењето објави дека на 6 септември Ејги била намерно земена за цел и убиена од израелски снајперист позициониран на блискиот покрив.
Очевидци изјавија дека кога била застрелана од снајперистот, Ејги била далеку од зоната на протестите. Таа беше пренесена во палестинска болница, но и покрај максималните напори на лекарите не можеше да се спаси.
Турските дипломатски мисии во Тел Авив и Ерусалим (КУДС) го координираа трансферот на нејзиното тело од Тел Авив во Баку, Азербејџан, а потоа и до Туркије.
Турските власти го примија телото на Ејги во петокот и го транспортираа до Судската медицина во Измир на обдукција.
Туркије во четвртокот започна истрага за убиството согласно домашното право.
Обдукцијата покажа дека куршумот влегол низ пределот на долниот дел на увото.
Ејги беше застрелана во главата за време на мирен протест, која потоа почина во болницата.
Обдукцијата на Судската медицина во Измир покажа дека причината за нејзината смрт е фрактура на черепот, крварење на мозокот и оштетување на мозочното ткиво. Имало влезна рана од куршум но нема излезна рана, се анализираат металните фрагменти од куршумот. Процедурата за тоа е во тек.
