Vendet evropiane në rënie në fushën e matematikës dhe shkencës, ngrihen shqetësime mbi sistemin arsimor

Renditjet e fundit në Studimin e Trendeve Ndërkombëtare të Matematikës dhe Shkencës (Timss) për vitin 2023 zbulojnë një realitet shqetësues për sistemin arsimor evropian, transmeton Anadolu.

Studimi, i publikuar të mërkurën, ndezi debate të gjera në gjithë Evropën rreth pabarazive në sistemet arsimore dhe rënies së performancës që kërcënon konkurrencën e kontinentit.

Ndërsa Franca mbetet nën mesataren e OECD-së (Organizata për Bashkëpunim dhe Zhvillim Ekonomik) si në matematikë ashtu edhe në shkencë, me performancë veçanërisht të dobët në krahasim me fqinjët e saj evropianë, shqetësimet rriten për ndikimin afatgjatë në sistemin arsimor të vendit dhe aftësinë e tij për të konkurruar globalisht, raportoi Le Monde.

Ndërsa rezultatet e nxënësit francezë duket se janë stabilizuar pas viteve të rënies, pabarazitë e konsiderueshme në arritje kanë arritur nivele shqetësuese, duke ngritur pikëpyetje për të ardhmen e sistemit arsimor të vendit.

Sipas studimit, Franca vazhdon të renditet ndër vendet me performancën më të keqe në Evropë. Në matematikë, nxënësit francezë në nivelin CM1 dhe klasën e 4-t renditen përkatësisht të dytët dhe të fundit në Bashkimin Evropian.

Rezultatet për nxënësit CM1 në matematikë (484 pikë) dhe shkencë (488 pikë) kanë mbetur pothuajse të pandryshuara që nga viti 2019, shumë prapa mesatares evropiane prej 524 pikësh në matematikë dhe 518 në shkencë.

Hendeku midis Francës dhe vendeve me performancën më të mirë si Singapori, Tajvani dhe Koreja e Jugut mbetet i rëndësishëm.

Megjithatë, rënia e vazhdueshme e performancës duket se është ulur, sipas studimit.

Një nga gjetjet më alarmante është rritja e pabarazive arsimore, raportoi Le Parisien.

Në matematikë, hendeku midis nxënësve me prejardhje të avantazhuar dhe të pa favorizuar është 81 pikë, një nga më të mëdhenjtë midis vendeve të OECD-së.

Pabarazitë gjinore po rriten gjithashtu, veçanërisht në nivelin CM1, ku hendeku i performancës midis djemve dhe vajzave pothuajse është dyfishuar gjatë katër viteve, duke arritur në 23 pikë në favor të djemve.

Raporti thekson gjithashtu performancën e rajoneve frëngjishtfolëse belge dhe të Britanisë.

Federata Vallonia-Bruksel renditet menjëherë pas Francës në matematikë dhe shkencë, me rezultate që e vendosin atë në fund të renditjes evropiane, raportoi Le Soir.

Nxënësit belgë në këtë rajon kanë shënuar 481 pikë në matematikë dhe 485 në shkencë, më poshtë se rezultatet e Francës prej 484 dhe 488 pikësh respektivisht. Në anën tjetër, komuniteti flamand i Belgjikës ka performuar më mirë, duke u renditur i 24-ti në matematikë dhe i 35-ti në shkencë.

Ndërkaq, Anglia ka shënuar një performancë të përzier. Ndërsa nxënësit e vitit 5 (9-10 vjeç) të vendit pësuan një rënie të lehtë në matematikë (duke rënë në 552 pikë nga 556 në 2019), nxënësit e vitit 9 (13-14 vjeç) kanë shënuar një rritje modeste si në matematikë (525 pikë), ashtu edhe në shkencë (531 pikë).

Pavarësisht këtyre përmirësimeve, Anglia në matematikë ende mbetet prapa disa vendeve të Azisë Lindore, duke përfshirë Singaporin, Tajvanin dhe Korenë e Jugut, raportoi The Guardian.

Megjithatë, ajo ka arritur të tejkalojë disa kombe të tjera në shkencë, duke siguruar renditjen e 5-të për shkencën e vitit 5 dhe të 6-tën për shkencën e vitit 9.

Ndarja socio-ekonomike mbetet një faktor kritik në të gjitha këto vende.

Në Francë, hendeku midis nxënësve nga shtresat më të favorshme dhe atyre të pa favorizuara është 81 pikë në matematikë dhe 92 pikë në shkencë. Kjo pabarazi në rritje në arsim ngre shqetësime për të ardhmen e nxënësve nga komunitetet e pa favorizuara, të cilët rrezikojnë të mbeten më mbrapa.

Ndërsa këto rezultate nxisin debate në gjithë Evropën, presioni është mbi qeveritë për të zbatuar reforma që adresojnë këto pabarazi të rrënjosura thellë dhe përmirësojnë performancën akademike.